Zëvendëskryeministrja edhe ministrja Punëve të Jashtme dhe Diasporës, Donika Gërvalla-Schwarc, tha se viti 2023 me pak fjalë mund të përmblidhet si vit i arritjeve të mëdha.
Gërvalla-Schwarc gjatë një konference të përbashkët me kryeministrin Albin Kurti, tha se ky vit do të mbahet mend nga qytetarët e Kosovës si viti i fundit i izolimit dhe përjashtimit nga liberalizimi i merituar i vizave.
“Viti 2023 me pak fjalë mund të përmblidhet si vit i arritjeve të mëdha por njëkohësisht edhe i sfidave të mëdha. Viti 2023 nga qytetarët e Republikës sonë do të mbahet mend si viti i fundit i izolimit, i përjashtimit të tyre nga liberalizimi i merituar i vizave. Në themel jo vetëm të ndërlidhjes së lirë të qytetarëve në BE por edhe integrimit të vendit tonë qëndron forcimi i dukshëm i sundimit të ligjit dhe demokracisë. Pa ndryshimet cilësore në vend nuk do të kishim arritur as përmirësimin cilësor të pozicionit të Kosovës në arenën ndërkombëtare”, u shpreh Gërvalla-Schwarc.
