Një valë e ftohtë në Afganistan ka vrarë mbi 280.000 krerë bagëtish që nga 25 shkurti, tha Organizata e Ushqimit dhe Bujqësisë (FAO), transmeton Anadolu.
Organizata, agjenci e OKB-së, tha se ka ekzaminuar të dhënat klimatike të marra nga satelitët gjatë periudhës për të kuptuar ndikimin e motit të ftohtë në vend.
Administrata e përkohshme e talebanëve muajin e kaluar raportoi vdekjen e 60 personave për shkak të temperaturave të acarta në më shumë se tri javë deri në mes të marsit.
Sipas Janan Saiq, zëdhënës i Ministrisë së Menaxhimit të Fatkeqësive Natyrore, viktimat kanë humbur jetën nga moti i ftohtë për shkak të reshjeve të mëdha të borës dhe shiut.
Rreth 34 të tjerë janë lënduar gjithashtu, ndërsa mbi 1.600 shtëpi janë shkatërruar gjatë të njëjtës periudhë, tha ai.
Me një periudhë më të gjatë të valëve të ftohta këtë dimër, FAO tha se vendi regjistroi temperaturën më të ulët prej minus 21 gradë Celsius më 25 shkurt, me provincën verilindore Badakhshan si vendi më i ftohtë.
“Vala e ftohtë u zhvendos nga një vend në tjetrin… prandaj, numri i fshatrave të prekura dhe shtrirja e valës së ftohtë u rrit” në provincat Badakhshan, Bamyan, Daykundi, Ghor, Nuristan, Panjshir, Parwan dhe Samangan, tha FAO.
Afganistani ka dëshmuar disa përmbytje, tërmete dhe thatësira gjatë viteve të fundit, duke përkeqësuar gjendjen tashmë të dobët të infrastrukturës së vendit.
FAO sugjeroi asistencë të synuar për provincat e prekura si dhe masa për mbrojtjen e bagëtive mes ndikimit shkatërrues të motit të ftohtë.
