Autoritetet gjermane ndaluan një shoqatë propalestineze me justifikimin për “botëkuptimin e saj antiizraelit” dhe mbështetjen për Hamasin, transmeton Anadolu.
Ministri i Brendshëm i rajonit Rajna Veriore-Vestfalia Herbert Reul tha se shoqata “Solidariteti me Palestinën Duisburg” u ndalua, asetet e saj u konfiskuan dhe faqet e internetit të grupit do të mbyllen.
“Ky ndalim vjen në kohën e duhur dhe dërgon sinjalin e duhur”, tha ai në një deklaratë, duke pretenduar se grupi mbështet çlirimin e Palestinës brenda kufijve të vitit 1947 dhe avokon për shkatërrimin e shtetit izraelit.
“Ne po përdorim të gjitha opsionet ligjore për të tharë antisemitizmin dhe mbështetjen ideologjike për terrorin. Sot shteti ka treguar një qëndrim të qartë kundër ekstremizmit”, tha ai.
Policia bastisi shtëpitë e disa anëtarëve të grupit në orët e para të mëngjesit, konfiskoi dokumente të ndryshme, laptopë dhe telefona celularë, thuhet në njoftimin e Ministrisë së Brendshme.
Gjermania ka qenë aleat i vendosur i Izraelit dhe zyrtarët qeveritarë kanë thënë vazhdimisht se vendi mban përgjegjësi të veçantë për Izraelin për shkak të së kaluarës naziste të vendit.
Në muajt e fundit autoritetet gjermane kanë goditur grupet propalestineze, kanë ndaluar qindra protesta dhe kanë lëshuar ndalime të udhëtimit ndaj figurave të shquara ndërkombëtare që u ftuan të flisnin në ngjarjet propalestineze në vend.
Kritikët akuzojnë Berlinin se i ka dhënë një mbështetje të plotë politikave kontroverse të kryeministrit Benjamin Netanyahu dhe se ka mbyllur sytë ndaj krimeve të luftës të kryera nga ushtria izraelite në Gaza.
