Me ftesë të presidentit të El Salvadorit Nayib Bukele, presidentja e Kosovës, Vjosa Osmani, ka udhëtuar zyrtarisht për në El Salvador.
Presidentja do të marrë pjesë në Inaugurimin e presidentit të ri-zgjedhur Nayib Bukele.
“Gjatë qëndrimit në San Salvador, Presidentja Osmani do të zhvillojë një sërë takimesh bilaterale me udhëheqës shtetëror të El Salvadorit, duke filluar me Presidentin Bukele. Fokusi i këtyre takimeve do të jetë forcimi i marrëdhënieve bilaterale, bashkëpunimit ndërshtetëror si dhe forcimi i aleancave ekzistuese dhe krijimi i aleancave të reja me shtete në rajonin e Amerikës Latine”, thuhet në njoftimin e Presidencës së Kosovës.
Vizita e Osmanit është e para e një kreu të shtetit të Republikës së Kosovës në këtë shtet.
Ndërkohë, është bërë e ditur se presidentja po ashtu do të zhvillojë një sërë takimesh të tjera bilaterale me përfaqësues të shteteve të tjera.
