Gent Gjini, avokat i autorizuar nga familja Hajrizi, ka paralajmëruar padi ndaj disa personaliteteve për denigrimin e figurës së Faton Hajrizit, i cili është vrarë në Serbi të premten e javës së kaluar.
Gjini tha sot se në emër të familjes pritet të ngre padi ndaj avokatit Gazmend Halilaj për deklarimet e tij lidhur me figurën e Faton Hajrizit.
“Do të bëjmë padi ndaj disa disa personaliteteve të mediave që kanë bërë baltosje ndaj personalitetit të Faton Hajrizit”, tha ai në emisionin Kosova Today në Klan Kosova të enjten, derisa i pyetur nëse do ta padisë edhe avokatin Halilaj, ai e pohoi.
I pyetur për deklarimet e kryeministrit Albin Kurti dhe zëvendësit të tij Besnik Bislimi të cilët e quajtën “kriminel” Faton Hajrizin, avokati Gjini tha se gjuha e përdorur nga numrat një dhe dy të qeverisë është “denigruese”.
“Si e njeh ai Faton Hajrizin kur ai nuk tregon sesi e njeh.. do të ngritim padi edhe për të edhe për disa media. Kjo gjuhë është fyese, denigruese”, tha Gjini.
Ai nuk u shpreh me saktësi nëse do t’i padisë shefat e qeverisë.
