Shtetet e Bashkuara të Amerikës (ShBA) kanë ndarë me presidenten Vjosa Osmani, vlerësimet e sigurisë që kanë të bëjnë me rrezikimin e jetës së ushtarëve amerikanë nëse bëhet hapja e Urës së Ibrit në këtë kohë.
Këtë për Dukagjinin e ka konfirmuar Bekim Kupina, këshilltari për media i presidentes Osmani.
“Konfirmojmë se Shtetet e Bashkuara të Amerikës kanë ndarë me Presidenten, vlerësimet e sigurisë që kanë të bëjnë me rrezikimin e jetës së ushtarëve amerikanë, të cilët çdoherë kanë dalë në mbrojtje të sovranitetit, integritetit territorial dhe jetës së qytetarëve tanë”, ka thënë Kupina.
Ai ka shtuar se ShBA-ja asnjëherë, në asnjë takim me presidenten, nuk është shprehur se është kundër hapjes së urës.
Ambasadori amerikan në Kosovë, Jeffrey Hovenier ka thënë Radios Evropa e Lirë se hapja e urës në këtë kohë rrezikon ushtarët amerikanë, andaj nuk duhet të hapet.
Ndërkaq Bashkimi Evropian ka planifikuar që ta vendosë çështjen e Urës së Ibrit në agjendën e takimit të ardhshëm në kuadër të dialogut Kosovë-Serbi.
Ndaj kësaj deklarate të BE-së kishte reaguar menjëherë presidentja Osmani.
“Çështja e urës nuk duhet asesi të bëhet temë e dialogut me Serbinë. Një gjë e tillë do të ishte shkelje e rëndë e sovranitetit, integritetit territorial dhe e kushtetutshmërisë në vendin tonë. Vuçiqi nuk ka çka pyetet se kur do të hapen urat për qarkullim në Republikën e Kosovës”, kishte deklaruar Osmani më 1 gusht.
The post ShBA-ja në takimet me presidenten Osmani asnjëherë nuk u shpreh kundër hapjes së urës së Ibrit first appeared on Radio Televizioni Iliria.
