Enklava spanjolle Ceuta në Afrikën Veriore ka shpallur “emergjencë humanitare” pasi po përballet me një rritje dramatike të migrantëve që mbizotërojnë objektet e saj, transmeton Anadolu.
Qeveria rajonale e qytetit Ceuta raportoi se objektet e saj për të miturit e pashoqëruar funksionojnë me 360 për qind mbi kapacitetin.
Zëdhënësi i qeverisë rajonale në Ceuta, Alberto Gaitan, tha për transmetuesin ‘Cadena Ser’ se qyteti Ceuta, i cili ka një sipërfaqe 18 kilometra katrorë, “nuk mund të gjejë hapësira të reja për t’i akomoduar ata me dinjitet”.
“Ne nuk do të lejojmë që qyteti të bëhet një burg për migrantët”, tha Gaitan.
Këtë vit, sipas shifrave zyrtare, Ceuta ka parë një rritje gjashtëfish të mbërritjeve të parregullta të migrantëve në krahasim me vitin 2023.
Në përgjigje të krizës, qeveria rajonale në Ceuta mbrëmë mbajti një takim urgjent pas çka njoftoi planet për t’i kërkuar Madridit burime shtesë dhe për të pranuar më shumë migrantë në tokën spanjolle.
Ishujt Kanarie po luftojnë gjithashtu me një krizë migrantësh, me një nevojë urgjente për të zhvendosur të paktën 3 mijë nga 6 mijë migrantë të rinj të vendosur aktualisht në strehimore të specializuara për shkak të kapacitetit të tepërt.
Nga 1 janari deri më 31 korrik të këtij viti, rreth 30 mijë migrantë arritën në mënyrë të parregullt në Spanjë nga toka ose deti, duke shënuar një rritje prej 80 për qind krahasuar me vitin e kaluar. Vetëm Ishujt Kanarie regjistruan afër 21.500 mbërritje.
Së fundmi, qeveria e Spanjës propozoi një projektligj për t’u kërkuar qeverive rajonale të pranojnë një kuotë të migrantëve të rinj nga Ishujt Kanarie, si dhe nga enklavat Ceuta dhe Melilla. Megjithatë, projektligji nuk u miratua pasi partitë opozitare dhe partia separatiste katalanase ‘Junts’ votuan kundër tij.
Pavarësisht kësaj, marrëveshja vullnetare e Partisë Popullore konservatore për të pranuar pak më pak se 400 migrantë të rinj në rajonet e saj të qeverisjes çoi në shpërbërjen e aleancave nga partia e ekstremit të djathtë ‘Vox’ dhe prishjen e qeverive rajonale të koalicionit.
Qeveria rajonale në Ceuta udhëhiqet nga Partia Popullore.
