Në kryeqytetin e Afganistanit, Kabul, 21 persona kanë humbur jetën dje nga një shpërthim që ndodhi në një xhami gjatë namazit të akshamit, transmeton Anadolu Agency (AA).
Duke folur për Tolo TV, zëdhënësi i Departamentit të Policisë së Kabulit, Khalid Zadran, dha informacione për viktimat në shpërthimin që ndodhi gjatë namazit të akshamit në xhaminë Sadikiye Sar-e Kotal të lagjes Khair khana.
Zadran njoftoi se si pasojë e shpërthimit kanë humbur jetën 21 persona dhe janë lënduar 33 persona të tjerë.
Ndërkaq askush nuk e ka marrë ende përgjegjësinë për sulmin.
Në një deklaratë në llogarinë e tij personale në Twitter, zëdhënësi i talebanëve, Zabihullah Mujahid, dënoi incidentin dhe tha se autorët do të zbulohen sa më shpejt të jetë e mundur.
Edhe Ministria e Jashtme e Turqisë ka lëshuar një mesazh ngushëllimi për viktimat që humbën jetën në sulmin terrorist. /aa
