Raportuesja speciale e Kombeve të Bashkuara për territorin palestinez të pushtuar, Francesca Albanese, ka bërë thirrje për krijimin urgjent të një pranie ndërkombëtare për mbrojtjen e palestinezëve në Bregun Perëndimor, Jerusalemin Lindor dhe Rripin e Gazës.
Albanese tha se krijimi i një force apo pranie ndërkombëtare mbrojtëse është “absolutisht urgjent”. Ajo theksoi se shtetet e tjera kanë detyrim, në përputhje me opinionin e Gjykatës Ndërkombëtare të Drejtësisë, të veprojnë për t’i dhënë fund pushtimit izraelit të territorit palestinez.
Ajo ngriti gjithashtu pyetjen nëse përpjekjet diplomatike të sekretarit të përgjithshëm të OKB-së dhe mekanizmi i Asamblesë së Përgjithshme “Bashkimi për Paqe” mund të përdoren për të anashkaluar bllokimin në Këshillin e Sigurimit.
Në korrik të vitit 2024, Gjykata Ndërkombëtare e Drejtësisë e konsideroi të paligjshëm pushtimin izraelit të territorit palestinez dhe theksoi detyrimet e shteteve të tjera për të mos ndihmuar në vazhdimin e tij.
Këshilli i Sigurimit i OKB-së ka dështuar në disa raste të ndërmarrë veprime për situatën në Gaza dhe Bregun Perëndimor, për shkak të vetove, përfshirë ato të Shteteve të Bashkuara.
Mekanizmi “Bashkimi për Paqe” i lejon Asamblesë së Përgjithshme të shqyrtojë çështje të paqes dhe sigurisë ndërkombëtare kur Këshilli i Sigurimit nuk është në gjendje të veprojë për shkak të mungesës së unanimitetit mes anëtarëve të tij të përhershëm. /mesazhi
