Finlanda do të shqyrtojë bashkimin me NATO-n pa Suedinë. Kështu ka deklaruar ministri i Jashtëm i vendit nordik, pasi Turqia përjashtoi mbështetjen ndaj Stokholmit, pas një proteste të mbajtur atje, ku u dogj libri i shenjtë i Kuranit.
“Anëtarësimi bashkarisht mbetet opsioni i parë, por neve do na duhet të ecim përpara nëse ndodh diçka që pengon Suedinë të lëvizë në të njëjtin drejtim”, ka deklaruar Pekka Haavisto.
Megjithatë, shefi i diplomacisë finlandeze ka nënvizuar se “është ende herët” për të marrë një vendim të tillë.
Të hënën, presidenti turk Erdogan deklaroi se Suedia nuk mund të presë më mbështetjen e Ankarasë pas manifestimit ku u dogj Kurani, që nxiti protesta në Turqi dhe botën myslimane.
Gjithashtu, deklarata e tij erdhi pasi komuniteti kurd në kryeqytetin suedez vari një statujë shëmbëlltyrë të presidentit Erdogan.
“Suedia nuk mund të presë gjë nga ne. Është e qartë se ata që shkaktuan një fatkeqësi të tillë përpara ambasadës sonë nuk mund të presin akte dashamirëse nga ne”, tha kreu i shtetit turk.
Në maj të vitit të kaluar, Suedia dhe Finlanda aplikuan për t’u bashkuar me Aleancën Euro-Atlantike, pas pushtimit rus të Ukrainës.
Por të dyja vendeve u duhet aprovimi i Turqisë, vend anëtar i NATO-s, që të anëtarësohen me të drejta të plota.
Deri tani Ankaraja ka bllokuar përpjekjet e tyre, në mënyrë që të detyrojë Helsinkin dhe Stokholmin të përmbushin një seri kriteresh politike, si ekstradimi i anëtarëve të një grupi kurd të cilin Erdogan e cilëson si “terrorist”.
