Arabia Saudite, Libia, Kuvajti dhe Maroku e kanë cilësuar si një akt provokativ kundër muslimanëve në muajin e Ramazanit sulmin ndaj Kuranit në Danimarkë dhe e kanë dënuar fuqimisht këtë veprim, transmeton Anadolu.
Përmes një deklarate me shkrim nga Ministria e Jashtme e Arabisë Saudite, është reaguar ndaj djegies së Kuranit nga një grup ekstremist në Danimarkë.
“Nevojitet përmirësim i vlerave të dialogut, tolerancës dhe respektit. Arabia Saudite refuzon çdo gjë që do të përhapë urrejtjen, ekstremizmin dhe përjashtimin”, thuhet në deklaratë.
– Libia
Sulmin në fjalë e ka dënuar edhe qeveria e unitetit kombëtar të Libisë.
Në një deklaratë nga Ministria e Jashtme thuhet se djegia e Kuranit kryesisht në muajin e Ramazanit është një sulm i hapur dhe një akt racist i cili provokon ndjenjat e muslimanëve në të gjithë botën.
“Ky akt i rrezikshëm nxit dhunën dhe urrejtjen, thuhet në deklaratën ku komunitetit ndërkombëtar i bëhet thirrje që të marrë përsipër përgjegjësitë e tij si dhe të qëndrojë përballë retorikës së urrejtjes dhe akteve islamofobike që bëhen në mënyrë sistematike.
– Kuvajti
Edhe ministria e jashtme e Kuvajtit në një deklaratë me shkrim, ka dënuar ashpër sulmin e kryer ndaj Kuranit në Kopenhag, kryeqytetin e Danimarkës.
Në deklaratë sulmi cilësohet si “një hap i ri provokativ që do të nxisë ndjenjat e muslimanëve në mbarë botën kryesisht në muajin e ramazanit” dhe nga të gjitha vendet dhe organizatat ndërkombëtare, kërkohet që të përmbushin përgjegjësitë e tyre për ndalimin e këtyre akteve që përsëriten ndaj simboleve dhe të shenjtave të muslimanëve si dhe që të kërkohet llogari nga autorët.
– Maroku
Sulmin e kryer ndaj Kuranit në Danimarkë e ka dënuar ashpër përmes një deklarate edhe Ministria e Jashtme e Marokut.
Në deklaratën e ministrisë sulmi cilësohet si një akt provokues dhe i neveritshëm që dëmton ndjenjat dhe të shenjtat e mbi një miliard muslimanëve veçanërisht në muajin e Ramazanit. Më tej në deklaratën ku sulmi konsiderohet i “papranueshëm” dhe autoriteteve daneze u bëhet thirrje që të luftojë me “sjellje të tilla të papërgjegjshme dhe nxitëse” dhe të mos lejojë që kjo të përsëritet me asnjë arsye.
Po ashtu edhe Katari dhe Jordania e kanë dënuar sulmin me deklaratat e tyre të bëra më parë.
– Ankara
Ministria e Jashtme e Turqisë ka dënuar të shtunën në mënyrën më të fuqishme sulmin e kryer kundër Kuranit dhe flamurit turk në Danimarkë, transmeton Anadolu.
“Dënojmë në mënyrën më të fuqishme sulmin e kryer mbrëmë në Danimarkë kundër librit tonë të shenjtë Kuranit dhe flamurit tonë të lavdishëm. Nuk pranojmë në mënyrë kategorike që ky akt i ulët, që përbën një krim urrejtjeje, të lejohet nën emrin e lirisë së shprehjes”, thuhet në deklaratën me shkrim nga Ministria e Jashtme.
“Ky veprim i kryer në muajin e Ramazanit tregon dhe njëherë qartë se armiqësia ndaj Islamit, diskriminimi dhe ksenofobia kanë arritur në nivele edhe më shqetësuese për çdo ditë që kalon në Evropë dhe se nuk është marrë asnjë mësim nga e kaluara”, theksohet në deklaratën ku bëhet e ditur se autoritetet daneze janë njoftuar se Turqia dënon në mënyrën më të fuqishme këtë akt.
Më tej në deklaratë autoriteteve të Danimarkës u bëhet thirrje që të ndërmarrin veprimet e nevojshme kundër autorëve të këtij krimi të urrejtjes në fjalë dhe të marrin masa konkretë me qëllimin për të parandaluar provokime të tilla që vendosin në objektiv qetësinë sociale dhe kulturën e bashkëjetesës paqësore.
Më 27 janar në Danimarkë u dogj një kopje e Kuranit para xhamisë dhe Ambasadës së Turqisë në Kopenhagë.
Poashtu edhe në kryeqytetin e Suedisë, Stockholm, më 21 janar ishte kryer një sulm i ngjashëm kundër Kuranit.
