Bashkimi Evropian (BE) i quajti “të patolerueshme” bombardimet joselektive të forcave izraelite në Rripin e Gazës dhe i kërkoi Izraelit të parandalojë viktimat civile, raporton Anadolu.
Përshkallëzimi i konfliktit midis Izraelit dhe Palestinës “është një burim shqetësimi për BE-në”, u tha gazetarëve në Bruksel Peter Stano, zëdhënësi kryesor i shërbimit diplomatik të BE-së.
“Është e papranueshme të shohësh raketa joselektive në Gaza”, shtoi ai.
Zëdhënësi theksoi se Izraeli duhet “të marrë masa paraprake dhe të gjitha masat e mundshme për të parandaluar viktimat civile në operacionet e tij dhe të respektojë ligjin ndërkombëtar humanitar”.
Stano përsëriti thirrjen e BE-së për të dyja palët që të “ushtrojnë përmbajtje maksimale”.
Ai ripohoi mbështetjen e BE-së për rinisjen e procesit të paqes në Lindjen e Mesme në mënyrë që të arrihet një zgjidhje e qëndrueshme politike në vend të armëpushimeve të përkohshme.
Të paktën 25 persona vdiqën dhe 76 të tjerë u plagosën në sulmet ajrore izraelite në Rripin e Gazës gjatë dy ditëve të fundit, sipas Ministrisë palestineze të Shëndetësisë.
Ushtria izraelite nisi sulmet ajrore si pjesë e një kundërofensive pasi raketa u gjuajtën nga Gaza pas vdekjes së një të burgosuri palestinez, i cili ishte në grevë urie në një burg izraelit.
