Bashkimi Evropian ka thënë të enjten se Prishtina duhet t’i japë kohë të mjaftueshme zbatimit të vendimit, sipas të cilit serbët që jetojnë në veri të Kosovës, t’i kalojnë targat e veturave të tyre të lëshuara nga Serbia në ato të Kosovës, brenda dy muajve.
Kështu citohet ti ketë thënë Reuters, një zëdhënës i Komisionit Evropian, transmeton Telegrafi.
“Është e rëndësishme që të jepet kohë e mjaftueshme për zbatimin e këtij plani dhe që ai të jetë i përgatitur dhe të zbatohet në konsultim të ngushtë me qytetarët që afektohen nga vendimi, në linjë me praktikat e mira evropiane”, tha një zëdhënës i Komisionit Evropian.
“Konkluzionet e vitit 2016 për lirinë e lëvizjes kanë përfshirë një afat më të gjatë kohor për riregjistrim, që duhet të ofrojë udhëzime për procesin e tanishëm”, shtoi ky zëdhënës.
Zëdhënësi tha se BE u kërkoi “të dyja palëve të shfrytëzojnë dialogun e lehtësuar nga BE si platformë për të adresuar dhe zgjidhur të gjitha çështjet e hapura midis tyre … duke përfshirë edhe çështjet në lidhje me targat.”
Periudha e riregjistrimit të makinave me targa të lëshuara nga Serbia, që përdoren në veri të Kosovës (KM, PR, PZ, etj.), ka nisur më 1 shtator dhe do të zgjasë deri më 31 tetor.
