Presidenti i SHBA-së, Joe Biden, i përshkroi sulmet me raketa të Rusisë në një spital për fëmijë në Ukrainë si “një kujtim i tmerrshëm i brutalitetit të Rusisë”, transmeton Anadolu.
Presidenti Biden bëri një deklaratë me shkrim në lidhje me sulmet raketore të Rusisë ndaj Ukrainës.
“Sulmet me raketa të Rusisë, të cilat vranë dhjetëra civilë ukrainas dhe shkaktuan dëme dhe viktima në spitalin më të madh të fëmijëve në Kiev, janë një kujtesë e tmerrshme e brutalitetit të Rusisë”, tha Biden.
Duke thënë se është kritike që bota të vazhdojë të qëndrojë pranë Ukrainës dhe të mos injorohet “agresioni rus”, Biden kujtoi se do të presë presidentin ukrainas, Volodymyr Zelenskyy, dhe liderët e NATO-s në Washington këtë javë.
Biden theksoi se ai dhe aleatët e tij do të shpallin masa të reja për të forcuar mbrojtjen ajrore të Ukrainës.
– Ukraina njoftoi se Rusia kreu sulm intensiv me raketa
Presidenti ukrainas, Zelenskyy, raportoi se spitali i fëmijëve u dëmtua në sulmin intensiv me raketa të Rusisë dje në Kiev. Ai theksoi se përveç Kievit, qytetet Dnipro, Kriviy Rig, Slovyansk dhe Kramatorsk ishin shënjestruar me më shumë se 40 raketa të ndryshme.
Kryetari i bashkisë së Kievit, Vitaliy Klichko njoftoi se “Spitali i Fëmijëve Ohmatdit” u dëmtua në sulmin me raketa të kryer nga ushtria ruse. Shefi i Administratës Ushtarake të qytetit të Kievit, Sergey Popko deklaroi se qendra shëndetësore në rrethin Dnipro të Kievit u dëmtua si rezultat i sulmit rus dhe ndërtesa u shkatërrua pjesërisht.
Ministri ukrainas i Punëve të Brendshme, Igor Klimenko njoftoi se numri i të vdekurve nga sulmet intensive me raketa të Rusisë në vendin e tij u rrit në 36 ndërsa numri i të plagosurve në 166.
