Shtetet e Bashkuara të Amerikës kanë mirëpritur hapjen e negociatave për anëtarësimin e Shqipërisë dhe Maqedonisë së Veriut në Bashkimin Evropian.
Në një deklaratë, presidenti Joe Biden e ka konsideruar këtë veprim hap të rëndësishëm të BE-së për integrimin e Ballkanit Perëndimor në komunitetin euroatlantik.
“Në një kohë kur Rusia ka prishur paqen në Evropë, është më e rëndësishme se kurdo që të përkrahim aspiratat për një Evropë të plotë, të lirë dhe në paqe. Një Ballkan Perëndimor demokratik, i sigurt dhe i begatë mbetet thelbësor në këtë vizion”, ka thënë Bideni.
Ai ka shtuar se SHBA-ja “do të vazhdojë të jetë partner i fortë dhe i besueshëm i vendeve që punojnë për të mbrojtur të drejtat e njeriut, për reforma në forcimin e demokracisë dhe sundim të ligjit”.
“Hapat që BE-ja, Shqipëria dhe Maqedonia e Veriut i kanë marrë ditëve të fundit duhet t’i inspirojnë të gjithë ata që aspirojnë BE-në në rajon, që të rrisin përkushtimin në forcimin e demokracive të tyre”, ka thënë Bideni.
