Prokurorët e Nju Jorkut hoqën të gjitha akuzat penale kundër shumicës së studentëve dhe aktivistëve të arrestuar prillin e kaluar gjatë pushtimit të ndërtesës së Universitetit Columbia për të protestuar kundër luftës në Gaza.
Nga 46 personat e arrestuar në lidhje me pushtimin e Hamilton Hall, 31 personave u pushuan akuzat dje, të enjten.
Në atë kohë, zyrtarët e universitetit i kishin dhënë policisë dritën jeshile për të hyrë në godinë pasi studentët protestues injoruan paralajmërimet për t’u larguar.
Asnjë nga studentët e arrestuar nuk kishte precedentë të mëparshëm penalë dhe të gjithë përballeshin me procedim disiplinor.
Të 46 protestuesit, të cilët u arrestuan mbrëmjen e 30 prillit, u akuzuan fillimisht për kundërvajtje të shkallës së tretë. Zyra e Prokurorit të Qarkut në Manhatan i tha një gjykate të enjten se do të heqë akuzat kundër 31 protestuesve, duke përmendur “diskrecionin e prokurorisë dhe mungesën e provave”.
Prokurorët u thanë gjithashtu 14 të tjerëve se rastet e tyre do të pushoheshin nëse shmangnin arrestimin në gjashtë muajt e ardhshëm. Të pandehurit e refuzuan këtë kërkesë dhe do të kthehen të gjithë në gjykatë më 25 korrik. /abcnews
