Mbi 600.000 njerëz kanë emigruar nga Bosnjë e Hercegovina në dhjetë vitet e fundit, tha Mirhunisa Zukiq, presidente e Unionit për Kthim të Qëndrueshëm dhe Refugjatë në BeH, në prag të Ditës Botërore të Refugjatëve.
Ajo tha se migrimi i detyruar dhe largimi në pasiguri, me shumë pengesa dhe probleme, janë çështje të dhimbshme që ekzistojnë në Bosnjë e Hercegovinë dhe në Ballkanin Perëndimor për tri dekada, me procesin e kthimit ende të papërfunduar.
“Qendrat kolektive (përveç faktit që duhet të ndërtohen edhe 550 banesa për mbylljen e tyre) dhe numri prej 43.000 aplikantësh në Ministrinë për Refugjatët dhe Personat e Zhvendosur të BeH-së që kërkojnë rindërtimin e objekteve të tyre të banimit janë të dhëna që tregojnë përmasat e problemit të refugjatëve dhe personave të zhvendosur në BeH”, tha Zukiq për agjencinë e lajmeve Fena.
Dita Botërore e Refugjatëve shënohet më 20 qershor për të rritur ndërgjegjësimin për gjendjen e vështirë të njerëzve në mbarë botën që detyrohen të lënë shtëpitë e tyre. /trt
