Misioni paqeruajtës i KFOR-it në Kosovë, i udhëhequr nga NATO, ka njoftuar fillimin e një stërvitjeje operative që do të zgjasë deri në fund të tetorit.
Sipas njoftimit për media, stërvitja përfshin një kontingjent prej mbi 300 trupash nga Regjimenti Royal Yorkshire i Mbretërisë së Bashkuar, ka si qëllim testimin e procedurave për dislokimin e shpejtë të forcave shtesë dhe integrimin e tyre me operacionet e KFOR-it.
Aktivitetet do të zhvillohen në një periudhë ku KFOR-i synon të forcojë gatishmërinë për t’iu përgjigjur situatave të sigurisë në Kosovë.
Sipas KFOR-it, stërvitja mbështet zbatimin e mandatin të Kombeve të Bashkuara, bazuar në Rezolutën 1244 të Këshillit të Sigurimit, “për të garantuar një ambient të sigurt për të gjithë qytetarët dhe komunitetet në Kosovë”.
Përveç aktiviteteve stërvitore, KFOR-i do të marrë masa për t’i minimizuar efektet në trafikun rrugor, që mund të ndodhin si rezultat i lëvizjeve të trupave dhe automjeteve gjatë stërvitjes. Pas përfundimit të ushtrimeve, kontingjenti britanik do të ridislokohet dhe kthehet në Mbretërinë e Bashkuar.
Zyrtarët e KFOR-it kanë theksuar rëndësinë e këtij ushtrimi për forcimin e bashkëpunimit ndërmjet forcave ushtarake dhe për ruajtjen e stabilitetit në rajon.
The post Britania dislokon trupa shtesë në Kosovë për stërvitje me KFOR-in first appeared on Radio Televizioni Iliria.
