Ushtria izraelite po lufton civilët palestinezë në Rripin e Gazës, jo Hamasin, tha sot grupi izraelit për të drejtat e njeriut B’Tselem, transmeton Anadolu.
B’Tselem përmendi një sulm izraelit që synoi anëtarin e Hamasit Wissam Farhat në lagjen Shejaiya në qytetin e Gazës më 2 dhjetor.
“Sulmi vrau dhjetëra njerëz dhe shkatërroi shumë ndërtesa banimi. Qindra njerëz janë ende të varrosur nën rrënoja”, tha grupi i të drejtave.
“Duke pasur parasysh rezultatin, nuk ka dyshim se sulmi ishte i paligjshëm. Çdo sulm – edhe kundër një objektivi legjitim ushtarak – duhet të jetë në përputhje me parimin e proporcionalitetit, i cili kërkon që një sulm të ndërpritet nëse informacioni ekzistues tregon se dëmi i pritshëm për civilët tejkalon avantazhin e parashikuar ushtarak”, thuhet më tej.
B’Tselem tha se Izraeli pretendon se po bën gjithçka që është në fuqinë e tij për të shmangur dëmtimin e civilëve dhe paralajmërimin e civilëve që të evakuohen në zonat që i ka cilësuar si “të sigurta”.
“Izraeli mbështetet në dy argumente kryesore për të justifikuar dëmin e gjerë kriminal ndaj civilëve të shkaktuar nga politika e tij. Të dy argumentet janë të pabaza dhe të shkëputura nga e drejta ndërkombëtare humanitare dhe nga objektivat e saj”, thuhet në reagim.
Grupi i të drejtave tha se Izraeli supozon se nuk kanë mbetur civilë në zonat ku ai urdhëroi evakuimin.
“Ky pretendim nuk ka asnjë bazë në realitet. Fakti është se shumë civilë kanë mbetur në shtëpitë e tyre, ose sepse nuk mund të arrijnë në Gazën jugore për arsye të ndryshme ose sepse zgjedhin të mos largohen”, tha B’Tselem.
“Gjithashtu, edhe nëse civilët do të ishin evakuuar, kjo nuk do të justifikonte bombardimin e pakufizuar të shtëpive të tyre, të cilat janë objektiva civile – përveç nëse vërtetohet ndryshe”, deklaroi grupi.
Izraeli rifilloi ofensivën e tij ushtarake në territorin palestinez të premten pas përfundimit të një pauze humanitare njëjavore me grupin palestinez Hamas.
“Më shumë se dy milionë njerëz janë aktualisht të grumbulluar në jug të Rripit të Gazës pa pasur ku të shkojnë tjetër”, tha B’Tselem.
“Vazhdimi i zbatimit të kësaj politike të bombardimeve pothuajse me siguri do të rezultojë në vrasjen e mijëra civilëve të tjerë. Në këto rrethana, Izraeli duhet të ndalojë menjëherë zbatimin e kësaj politike, e cila po shkakton gjithnjë e më shumë vdekje dhe shkatërrime dhe përkeqëson katastrofën humanitare në Rripin e Gazës”, theksoi organizata.
Të paktën 16.248 palestinezë janë vrarë dhe më shumë se 43.616 të tjerë janë plagosur në sulmet intensive ajrore dhe tokësore në Rripin e Gazës që nga 7 tetori pas një sulmi ndërkufitar nga Hamasi.
Sipas shifrave zyrtare, numri i të vdekurve izraelitë është 1.200.
