Bullgaria po zhvillon sot zgjedhjet e saj të katërta parlamentare në 18 muaj.
Sondazhet e opinionit publik parashikojnë se deri në tetë parti mund ta kapërcejnë me sukses pengesën prej 4% për të hyrë në parlament. Partitë pro-ruse dhe nacionaliste si Vazrazhdane (Ringjallja) pritet të fitojnë terren.
Fituesi më i madh i votave ka të ngjarë të jetë partia e qendrës së djathtë (GERB) e ish-kryeministrit, Bojko Borisov, i cili u largua nga posti pas zgjedhjeve në prill 2021 mes akuzave për korrupsion dhe protestave kundër tij.
Sondazhet tregojnë se partia e qendrës PP është renditur në vendin e dytë.
Kiril Petkov, kreu i partisë, ka shërbyer si kryeministër derisa qeveria e tij liberal-socialiste u rrëzua në një votë mosbesimi në qershor, duke hapur rrugën për zgjedhjet e reja. Tani në Sofje qeveris një kabinet i përkohshëm.
Një grup i madh votuesish u thanë anketuesve se ishin të pavendosur.
Edhe nëse partia e Borisov, (GERB) zë vendin e parë, fitorja nuk ka gjasa të jetë mjaft e madhe për të qeverisur e vetme. Por, gjetja e partnerëve të koalicionit mund të jetë e ndërlikuar. (PP) tashmë ka refuzuar koalicionin me (GERB).
Pasojat e luftës së Rusisë ndaj Ukrainës kanë dominuar fushatën zgjedhore në vendin juglindor të BE-së. Ngrirja e dërgesave të gazit rus, rritja e çmimeve dhe një mosmarrëveshje lidhur me dërgesat e armëve në Kiev kanë formësuar diskutimet.
