Ministri i Jashtëm turk Mevlüt Çavuşoğlu tha se kërkesa e Turqisë për avionët luftarakë F-16 dhe aplikimi i Suedisë dhe Finlandës për anëtarësim në NATO “nuk kanë lidhje me njëra-tjetrën”, raporton Anadolu Agency (AA).
Duke folur për gazetarët pas takimit me homologun e tij amerikan Antony Blinken në Washington, Çavuşoğlu tha se Kongresi i SHBA-së nuk duhet t’i portretizojë këto çështje të veçanta si të lidhura me njëra-tjetrën.
“Ne themi se këto dy çështje të ndryshme nuk duhet të lidhen me njëra-tjetrën”, theksoi ai.
Duke e quajtur takimin e tij me Blinken-in “të frytshëm”, Çavuşoğlu tha se Turqia i ka propozuar SHBA-së që takimet e Mekanizmit Strategjik Turqi-SHBA të institucionalizohen dhe të mbahen të paktën dy herë në vit.
Ai tha se e ftoi gjithashtu homologun e tij për të vizituar Turqinë dhe për të marrë pjesë në Forumin e Diplomacisë në Antalya në mars.
I pyetur për shitjen e avionëve F-35 Greqisë, kryediplomati turk tha se politika e ekuilibruar e SHBA-së midis Turqisë dhe Greqisë është “përkeqësuar”.
Çavuşoğlu po ashtu tha se Turqia është e gatshme të bashkëpunojë me SHBA-në për t’u rifokusuar në Sirinë, por që Washington-i nuk i ka mbajtur disa nga premtimet e mëparshme.
