Pasi Rusia njoftoi se po pezullon marrëveshjen e Istanbul-it, çmimi i kontratave të grurit në bursën e Chicago-s u rrit me më shumë se 5 për qind, duke shkuar në 8,7 dollarë, transmeton Anadolu Agency (AA).
Kontratat e së ardhmes (Futures) të grurit në bursën tregtare të Chicagos (CBOT) u rritën me 5,4 për qind në 8,7 dollarë pasi tërheqja e Rusisë nga Iniciativa e Drithërave të Detit të Zi rriti shqetësimet për furnizimin global.
Çmimet e grurit u rritën në 8,9 dollarë në orët e para të ditës dhe u stabilizuan më pas në 8,7 dollarë, pasi regjistruan nivelin më të lartë që nga 14 tetori.
Çmimet e misrit gjithashtu u rritën 2,2 për qind në 6,96 dollarë për 25,40 kg.
Çmimet e grurit thyen rekord me 13,6 dollarë në muajin mars
Çmimet e grurit u rritën në 13,6 dollarë në mars, duke thyer rekorde në tregjet ndërkombëtare, me luftën ruso-ukrainase që solli në rendin e ditës problemet e furnizimit dhe efektin e rritjes së çmimeve të energjisë.
Meqenëse Rusia dhe Ukraina janë ndër furnizuesit më të mëdhenj të grurit në botë, tregjet e grurit janë të ndjeshme ndaj zhvillimeve në luftën tetë-mujore të Moskës kundër Kievit.
Përkundër lëvizjeve të forta të grurit në gjysmën e parë të këtij viti, kohën e fundit tërhiqnin vëmendjen uljet e fundit të çmimeve të grurit.
Ndërkohë që tendenca rënëse në tregun e mallrave vazhdoi pasi politikat monetare shtrënguese globale në mënyrë agresive rritën shqetësimet për recesionin, shitje të konsiderueshme u panë edhe te gruri.
Edhe pse shqetësimet për luftën Rusi-Ukrainë vazhduan, rihapja e eksporteve të drithërave nga Ukraina me Iniciativën e Drithërave e Detit të Zi rriti presionin e shitjes mbi mallrat bujqësore dhe çmimet e grurit u ulën në 7,4 dollarë.
Tërheqja e Rusisë nga Nisma e Drithërave të Detit të Zi
Ministria e Mbrojtjes e Rusisë më 29 tetor njoftoi se Ukraina kreu një sulm ndaj anijeve luftarake ruse dhe anijeve civile në qytetin e Sevastopolit në Krimenë e aneksuar.
Në deklaratë thuhet se në sulm janë përdorur shumë mjete ajrore pa pilot, duke shtuar se anijet e sulmuara të Marinës së Detit të Zi janë përfshirë në procesin e garantimit të sigurisë së korridorit të krijuar nën marrëveshje e grurit.
“Kievi, me pjesëmarrjen e ekspertëve britanikë, kreu një akt terrorist kundër anijeve të Flotës së Detit të Zi dhe anijeve civile të përfshira në sigurimin e korridorit të grurit”, thuhet në deklaratën e Ministrisë ruse të Mbrojtjes.
“Duke marrë parasysh aktin terrorist, pala ruse pezulloi pjesëmarrjen e saj në zbatimin e marrëveshjeve për daljen e produkteve bujqësore nga portet e Ukrainës”, thuhet në deklaratë.
Iniciativa për grurin e Detit të Zi, e realizuar nën koordinimin e Türkiye-s për zgjidhjen e krizës globale të ushqimit, u nënshkrua mes Ukrainës, Rusisë, Türkiye-s dhe Kombeve të Bashkuara, (OKB) nën kujdesin e presidentit turk, Recep Tayyip Erdoğan, në Istanbul më 22 korrik.
