Ushtria izraelite vrau dy fëmijë palestinezë sot në një sulm me dron në qytetin Bani Suhaila, në lindje të Khan Younisit, në pjesën jugore të Rripit të Gazës, njoftuan burime mjekësore, transmeton Anadolu.
Trupat e dy vëllezërve mbërritën në Spitalin “Nasser” në Khan Younis pas një sulmi izraelit pranë shkollës “al-Farabi” në Bani Suhaila, thanë burime mjekësore të spitalit për Anadolu.
Zona e goditur nga sulmi ndodhet brenda zonave që ushtria izraelite vazhdon t’i mbajë nën kontroll pavarësisht marrëveshjes së armëpushimit që hyri në fuqi më 10 tetor.
Palestinezët në atë zonë hasin vështirësi t’i identifikojnë këto zona sepse ushtria nuk ka vendosur blloqet e verdha të betonit që zakonisht shënojnë vijat ndarëse midis zonave që ajo kontrollon dhe atyre prej nga është tërhequr, sipas korrespondentit të Anadolus.
Disa banorë përpiqen të hyjnë në këto zona për të kërkuar dru zjarri ose ushqim, ose për t’u kthyer në shtëpitë e tyre të shkatërruara për të marrë dyshekë apo sende bazike ndërsa temperaturat e dimrit bien.
Më herët sot, ushtria izraelite intensifikoi sulmet tokësore, detare dhe ajrore në disa pjesë të Rripit të Gazës, të gjitha brenda zonave që Izraeli vazhdon t’i mbajë nën kontroll.
Bombardimet goditën lindjen e Qytetit Gaza, qytetin Beit Lahiya në veri, skajet lindore të kampit al-Bureij në Gazën qendrore dhe Rafahun, si dhe qytetet al-Qarara dhe Bani Suhaila në lindje të Khan Younisit, thanë dëshmitarët për Anadolu.
Izraeli ka vrarë gati 70.000 persona, kryesisht gra dhe fëmijë, dhe ka plagosur mbi 170.000 të tjerë në sulmet në Gaza që nga tetori 2023.
