Eksportet izraelite të armëve kanë shënuar një rritje të ndjeshme vitin e kaluar, transmeton Anadolu Agency (AA)
Të dhënat e Drejtorisë së Bashkëpunimit Ndërkombëtar të Mbrojtjes në kuadër të Ministrisë së Mbrojtjes së Izraelit treguan se eksportet e ushtrisë dhe sigurisë izraelite “u rritën me 30 për qind” vitin e kaluar, njoftoi Haaretz.
Industria izraelite e mbrojtjes raportoi kontrata të reja me vlerë 11,3 miliardë dollarë në 2021 krahasuar me 8,6 miliardë dollarë në vitin 2020, thuhet në raport.
Që nga shtatori, Izraeli kishte gati 4.000 kontrata të shitjeve ushtarake në krahasim me 5.400 kontrata shitjeje në 2021.
“Ky vit nuk ka përfunduar ende, por duket se është në rrugën e duhur për të arritur vëllime veçanërisht të larta të shitjeve dhe një listë të gjatë marrëveshjesh të mëdha të mbrojtjes”, tha Haaretz.
Gazeta ia atribuoi rritjen e shitjeve të armëve nënshkrimit të marrëveshjeve të normalizimit me katër vende arabe dhe luftës në Ukrainë.
Në vitin 2020, Izraeli nënshkroi marrëveshje normalizimi me Emiratet e Bashkuara Arabe, Bahrejnin, Marokun dhe Sudanin. Megjithatë, palestinezët dënuan marrëveshjet, duke thënë se ato injorojnë të drejtat e tyre dhe nuk i shërbejnë kauzës palestineze.
