Emiratet e Bashkuara Arabe (EBA) dhe Katari bënë thirrje për intensifikimin e përpjekjeve për të arritur një marrëveshje armëpushimi në Rripin e Gazës.
Thirrja u bë gjatë një takimi në Abu Dhabi midis presidentit të Emirateve të Bashkuara Arabe Mohamed bin Zayed Al Nahyan dhe Emirit të Katarit Tamim bin Hamad Al Thani.
Të dy liderët nënvizuan rëndësinë e shtimit të përpjekjeve “për të arritur një armëpushim të menjëhershëm në Gaza dhe për të ofruar mbrojtje të plotë për civilët”, njoftoi agjencia shtetërore e lajmeve në Emiratet WAM.
Ata gjithashtu pohuan mbështetjen për “të gjitha iniciativat dhe përpjekjet e bashkërenduara që synojnë de-përshkallëzimin e situatës në Gaza”.
Të premten, presidenti amerikan Joe Biden tha se Izraeli prezantoi një marrëveshje 3-fazore që do t’i jepte fund armiqësive në Rripin e Gazës dhe do të siguronte lirimin e pengjeve të mbajtura në enklavën bregdetare.
