Suedia do të japë mbështetje emergjente për likuiditet për prodhuesit e energjisë elektrike, pasi kryeministrja e saj paralajmëroi se vendimi i Rusisë për të ndalur dërgesat e gazit në Europë mund të shkaktojë probleme për sistemin financiar të vendit.
Magdalena Andersson tha se qeveria do të ofrojë qindra miliarda korona në financim për prodhuesit e energjisë elektrike, pasi këta të fundit po hasen me zhvlerësim të kolateralit si rrjedhojë e kostove të shtuara nga rritja e çmimeve të gazit dhe energjisë elektrike si dhe më shumë paqëndrueshmërive në treg.
Ministrat e energjisë të BE-së do të konsiderojnë gjithashtu marrjen e hapave për të lehtësuar mungesën e likuiditetit për kompanitë e energjisë në të gjithë bllokun në një takim urgjent të ditëve të fundit, sipas dy zyrtarëve të informuar mbi diskutimet, shkruan Financial Times.
Andersson paralajmëroi se, nëse nuk kontrollohet, rritja e kërkesave për kolateral për prodhuesit e energjisë elektrike mund të shpërthejë në tregun kryesor Nasdaq Clearing në Stokholm dhe, në rastin më të keq, të shkaktojë një krizë financiare.
Komentet e saj erdhën pasi Rusia tha të premten se nuk do të furnizonte më gaz nëpërmjet tubacionit Nordstream 1. Ky njoftim erdhi pasi tregjet e energjisë ishin mbyllur për fundjavën.
“Njoftimi i fundit jo vetëm që rrezikon të çojë në një “dimër lufte”, por gjithashtu kërcënon stabilitetin tonë financiar,” tha Andersson, duke qëndruar përkrah rregullatorit financiar të Suedisë, guvernatorit të bankës qendrore dhe ministrit të financave në një konferencë urgjente për shtyp.
Ministrja finlandeze e financave Annika Saarikko tha në Twitter se vendi i saj gjithashtu do të veprojë. “Shqetësimi është i përbashkët. Përgatitje të ngjashme tashmë janë duke u marrë në Finlandë”, shkroi Saarikko në Twitter.
Veprimet dramatike nënvizuan seriozitetin e situatës me të cilën përballet Europa, ndërsa ajo përpiqet të sigurojë energji të mjaftueshme përpara dimrit dhe përpiqet të shmangë përhapjen e shqetësimit midis prodhuesve të energjisë elektrike.
Pas rritjes në nivelin më të lartë të të gjitha kohërave, 10 ditë më parë, çmimet e gazit dhe energjisë elektrike ranë pak javën e kaluar, me standardet europiane të gazit dhe kontratat e energjisë gjermane që ranë të dyja me rreth një të tretën – megjithëse ato mbeten rreth 10 herë nivelet historike. Por mbyllja e zgjatur e Nord Stream 1 mund të shtojë paqëndrueshmërinë dhe të rrisë çmimet në tregtimet e kësaj jave.
Zyrtarët në Bruksel po punojnë në disa mënyra të mundshme për të ndihmuar kompanitë e energjisë, duke përfshirë mbështetjen e likuiditetit emergjent, thanë të dy zyrtarët. Diferencat në çmimet e energjisë po bëheshin “shumë të mëdha” për tu paguar nga prodhuesit e energjisë elektrike, tha njëri prej tyre.
Masa të tjera mund të përfshijnë kufizimet e çmimeve të energjisë elektrike ose gazit dhe mënyra për të shkëputur tregjet e gazit dhe energjisë elektrike përpara reformës afatgjatë. “Rusët do të luajnë me ne dhe ne nuk jemi të pajisur mirë për ta përballuar këtë”, tha zyrtari i dytë. /monitor
