Tifozët e Olympiacosit mbrëmë shpalosën një baner nacionalist dhe njëkohësisht kënduar “Kosova është Serbi”. Të njëjtit mbështetën terroristët e vrarë në Banjskë gjatë përballjes së fundit ndaj Aris.
Lidhur me këtë ka reaguar Fedarata e Futbollit e Kosovës, e cila e ka dënuar këtë akt.
Në njoftimin nga FFK thuhet se shafqja e pankartave kundër Kosovës dhe mbështetja ndaj grupit të terroristëve të cilët kryen terror ndaj Kosovës pak ditë më parë është një shkelje e rëndë e vlerave të futbollin dhe e papranueshme në futboll.
Ndër të tjerash, FFK ka shtuar se Kosova e konisderon Greqinë si një shtet mik dhe ka kërkuar nga autoritet greke që të jenë të kujdesshme në raste të tilla dhe t’i ndëshkojnë të gjitha incidentet.
Njoftimi i plotë:
Federata e Futbollit të Kosovës dënon me ashpërsi incidentin dhe fyerjen e rëndë të natyrës shoviniste që ndodhi në stadiumin “Karaiskakis”, në ndeshjen e kampionatit grek mes Olympiakosit dhe Arisit, mbrëmjen e kaluar.
Shfaqja e pankartave kundër Kosovës dhe lavdërimi i grupit të terroristëve që pak ditë më parë kryen agresion ndaj shtetit të Kosovës, është një shkelje e rëndë e vlerave të futbollit dhe shprehje e gjuhës së urrejtjes mes popujve. Ky incident është i papranueshëm dhe nuk ka vend në botën e futbollit.
Ne jemi të vetëdijshëm për lidhjen e fuqishme të grupit të tifozëve të Olympiakosit me grupet radikale të tifozëve në Serbi, dhe për faktin se disa prej tyre janë serbë të infiltruar në këtë grup. Megjithatë, jemi të indinjuar nga mungesa e reagimit të Federatës Greke të Futbollit për t’u përballur me këtë situatë. Lejimi i këtyre pankartave fashiste e raciste në tribunat prapa portës gjatë gjithë ndeshjes është një mospërgjegjësi që nuk mund të tolerohet.
Kosova e konsideron Greqinë si një shtet mik dhe vlerëson qasjen e saj pozitive karshi shtetit tonë në marrëdhëniet ndërkombëtare. Me këtë qasje pozitive, kërkojmë nga autoritetet e futbollit në Greqi të jenë të kujdesshme ndaj rasteve të tilla, të ndjekin me përgjegjësi protokollin e UEFA-s dhe të ndëshkojnë incidentet e tilla në mënyrë adekuate.
Federata e Futbollit e Kosovës do të vazhdojë të ndërtojë ura miqësie dhe bashkëpunimi në futboll dhe nuk do të lejojë që të ashtuquajturit tifozë ta keqpërdorin këtë sport me ngjyra raciste.
Ne kërkojmë nga UEFA që të angazhohet edhe më fuqishëm në luftën kundër diskriminimit në të gjitha stadiumet dhe të sigurojë që futbolli të mbetet një burim argëtimi dhe bashkëpunimi për të gjithë, duke ndihmuar kësisoj në mbrojtjen e vlerave ndërmjet popujve.
