Ministri i Jashtëm turk Hakan Fidan tha sot se Këshilli i Sigurimit i OKB-së nuk është në gjendje të bëjë thirrje për një armëpushim efektiv në Rripin e Gazës njëzëri, raporton Anadolu.
“Sulmet brutale të Izraelit ndaj Gazës dhe popullsisë së saj përbëjnë krime lufte. Ne u bëjmë thirrje të gjitha kombeve të civilizuara të mos i pranojnë këto krime”, tha Fidan në një takim të Këshillit të Sigurimit mbi situatën në Lindjen e Mesme.
Fidan tha se nevojiten institucione të forta globale në kohë kaq të vështira për të zbatuar ligjin ndërkombëtar dhe për të mbrojtur busullën morale të njerëzimit.
“Fatkeqësisht, Këshilli i Sigurimit, i mandatuar nga Karta e OKB-së, ka dështuar përsëri të përmbushë përgjegjësinë e tij për të ruajtur paqen dhe sigurinë ndërkombëtare”, theksoi kryediplomati turk.
“Nuk ishte në gjendje të bënte thirrje për një armëpushim efektiv me një zë”, shtoi ai.
Këshilli i Sigurimit nuk mund të paraqesë as një zgjidhje për të zhbërë padrejtësinë historike që palestinezët kanë vuajtur për shumë dekada, theksoi ai.
“Kjo paralizë me siguri do të jehojë në përballimin e krizave të tjera globale dhe do të gërryejë më tej besueshmërinë e Këshillit në sytë e njerëzimit. Ajo gjithashtu shkatërron sistemin ndërkombëtar të bazuar në rregulla mbi të cilin u krijuan Kombet e Bashkuara”, deklaroi më tej Fidan.
“Pa ligjin ndërkombëtar, parimet dhe një busull morale, ne jemi të gjithë në ujëra të paeksploruara. Nëse nuk e rregullojmë këtë problem së shpejti, të gjithë do të përballemi sërish me një radikalizëm të rëndë, i cili do të ushqehet nga padrejtësia dhe pandëshkueshmëria”, shtoi ministri i Jashtëm turk.
– Nevojitet propozimi i Turqisë për garantues për çështjen palestinezo-izraelite
Fidan tha se miliona njerëz në mbarë botën po mblidhen në solidaritet me Palestinën. Ata presin që Këshilli i Sigurimit të sigurojë një armëpushim që çon në ndërprerjen e armiqësive dhe të mundësojë ndihmën e papenguar humanitare në Gaza, tha ai.
“Ne po i ndjekim gjithashtu skenarët për të nesërmen me shqetësime të mëdha. Këto diskutime i japin municion të mëtejshëm Izraelit për të çrrënjosur miliona banorë të Gazës nga vendlindja e tyre dhe për të imponuar mbi ta një regjim shtypës”, theksoi Fidan.
“Prandaj, ne duhet ta përkthejmë këtë episod të errët në një mundësi për të adresuar shkakun rrënjësor të konfliktit. Përndryshe, simptomat që shohim sot do të jenë më katastrofike nesër”, tha ai.
Fidan përsëriti mbështetjen e Turqisë për një zgjidhje me dy shtete për konfliktin Palestinë-Izrael, i cili përfshin krijimin e një shteti palestinez me Kudsin Lindor si kryeqytet.
“Izraeli dhe Palestina duhet të jenë në gjendje të jetojnë krah për krah në paqe dhe siguri përgjatë kufijve të para vitit 1967, me Kudsin Lindor si kryeqytet i shtetit të Palestinës. Ne gjithashtu duhet të sigurohemi që një zgjidhje e tillë do të zbatohet, ndryshe nga përvojat e kaluara”, tha Fidan.
Duke folur për propozimin e Turqisë për një sistem garantues në konflikt, Fidan tha se mekanizmi do të ruajë paqen dhe do të parandalojë shkeljet nga ndonjë prej palëve.
“Kjo mund të parashikohet në procesin që çon në marrëveshjen përfundimtare dhe të bëhet pjesë e paketës”, tha ai.
“Nga deklaratat e shumë partnerëve tanë, ne kuptojmë se një mekanizëm i tillë është me të vërtetë i nevojshëm dhe i mbështetur”, deklaroi Fidan.
Ndërsa sulmi izraelit në Rripin e Gazës hyri në ditën e 53-të, Turqia ka qenë e palëkundur në mbështetjen e saj për Palestinën dhe ka thënë se do të vazhdojë të bëjë përpjekje për të ofruar të gjitha llojet e mbështetjes për popullin palestinez plotësisht brenda fushës së përpjekjeve të ndihmës humanitare.
Izraeli nisi një fushatë masive ushtarake në Rripin e Gazës pas një sulmi ndërkufitar nga Hamasi më 7 tetor.
Që atëherë, forcat izraelite kanë vrarë mbi 15.000 njerëz, duke përfshirë 6.150 fëmijë dhe 4.000 gra, sipas autoriteteve shëndetësore në enklavë.
Numri zyrtar i të vdekurve në Izrael është 1.200.
