Forcat izraelite plagosën 6 palestinezë, dy prej të cilëve me plumba të vërtetë, gjatë bastisjes në qytetin e Nablusit në Bregun Perëndimor të pushtuar, raporton Anadolu Agency (AA).
Ushtarët izraelitë bastisën disa zona në qytetin e Nablusit, rrethuan një shtëpi në zonën e qytetit të vjetër. Gjithashtu pati një përplasje mes palestinezëve që kundërshtuan bastisjet e ushtarëve izraelitë.
Drejtori i Shërbimit Emergjent të Gjysmëhënës së Kuqe Palestineze në Nablus, Ahmed Jibril për AA tha se si pasojë e përleshjeve 2 persona kanë mbetur të plagosur nga plumbat e vërtetë, 2 janë plagosur nga predha dhe 1 është plagosur nga plumbat plastikë.
Jibril theksoi se një palestinez me lëndime të lehta në kokë dhe 25 palestinezë të prekur nga gazi lotsjellës u trajtuan në vendngjarje.
Sipas informacioneve të marra nga burimet lokale, ushtarët izraelitë arrestuan një të ri palestinez për të cilin “kishte urdhër arresti” në bastisjen e tyre në qytetin e Nablusit.
Sipas televizionit izraelit “Channel 12”, personi i arrestuar i përket një grupi në Palestinë që e quan veten “Gropa e Luanit”.
“Gropa e Luanit” me bazë në Nablus
Në Palestinë, grupi i armatosur që e quan veten “Gropa e Luanit” u shfaq për herë të parë në një paradë ushtarake në qytetin e vjetër të Nablusit në fillim të shtatorit.
Sipas lajmeve të mediave izraelite, shumica e grupit përbëhet nga njerëz të armatosur të moshës 18-24 vjeç. Grupi shpjegon qëllimin e tij si mbrojtjen e Nablusit dhe rrethinave të tij nga ushtarët izraelitë.
Njoftohet se në grup ka anëtarë nga fraksione të ndryshme palestineze.