Komisioni Qendror i Zgjedhjeve ka miratuar planin e aktiviteteve dhe të buxhetit për zgjedhjet e parakohshme për Kuvendin e Kosovës më 7 qershor. Sipas Komisionit, fushata zgjedhore do të nisë nga 28 maji ndërkohë që organizimi i zgjedhjeve do të jetë 10 milionë e 800 mijë euro.
Pas caktimit dhe shpalljes të datës 7 qershor 2026 për mbajtjen e zgjedhjeve të parakohshme për Kuvendin e Kosovës, KQZ-ja mori disa vendime në kuadër të fillimit të përgatitjes për organizimin e këtyre zgjedhjeve.
Në këtë mbledhje, KQZ-ja mori vendim për caktimin e afateve dhe miratoi planin e aktiviteteve për organizimin e zgjedhjeve të parakohshme për Kuvendin e Kosovës, i cili përfshin, ndër të tjera: deklarimin e partive politike për pjesëmarrje/mospjesëmarrje në zgjedhje; deklarimin e partive politike për formimin e koalicioneve; aplikimin për certifikimin e subjekteve politike; dorëzimin e listave të kandidatëve dhe verifikimin e tyre; periudhën e fushatës zgjedhore; caktimin e qendrave të votimit, përfshirë përfaqësitë diplomatike; regjistrimin e votuesve brenda dhe jashtë Kosovës; periudhën e votimit përmes postës dhe në përfaqësi diplomatike; certifikimin e listës së votuesve; akreditimin e vëzhguesve dhe mediave; si dhe emërimin e anëtarëve të 38 Komisioneve Komunale të Zgjedhjeve dhe këshillave të vendvotimeve.
