Një gazetar izraelit ka përkrahur përdhunimin duke theksuar se duhet të bëhet një politikë zyrtare nga shteti për të burgosurat palestineze në burgjet izraelite, transmeton Anadolu.
“E vetmja gjë që është problem për mua këtu është se nuk është një politikë e rregulluar e shtetit të abuzojë me të burgosurat (palestineze)”, tha gazetari i ekstremit të djathtë Yehuda Schlesinger në një program televiziv në ‘Channel 12’ kur u pyet nëse përdhunimi i të burgosurve është i pranueshëm.
Ai i arsyetoi komentet e tij duke pohuar se “para së gjithash ata e meritojnë dhe është hakmarrje e madhe që ne duhet t’u japim atyre”.
“Dhe, së dyti, ndoshta do të na shërbejë edhe pak më shumë si parandalues. Është turp që nuk e bëjmë në mënyrë të institucionalizuar si pjesë e rregulloreve për torturimin e të burgosurave”, tha Schlesinger.
Komentet pasojnë raportet e mediave që treguan një video të një ushtari izraelit duke përdhunuar një palestineze të burgosur në burgun Sde Teiman në shkretëtirën Negev në Izraelin jugor.
Dhjetë ushtarë u arrestuan në fund të muajit të kaluar për përdhunimin e dyshuar të të burgosurës palestineze në qendrën e paraburgimit, ndërsa tre u liruan të dielën pasi dolën prova të reja.
Disa raporte për abuzime të rënda kundër të burgosurve palestinezë janë shfaqur që nga fillimi i ofensivës aktuale të Izraelit tetorin e kaluar në Rripin e Gazës.
Gjykata e Lartë e Izraelit po shqyrton një peticion të paraqitur nga organizatat izraelite të të drejtave të njeriut në lidhje me trajtimin e të burgosurve palestinezë në burg, ku të burgosurit nga Gaza përballen me tortura dhe neglizhencë mjekësore.
Autoritetet izraelite shpesh pretendojnë se hetojnë incidente të tilla, por rezultate të prekshme rrallë shihen.
Incidenti i fundit nxiti veprime nga grupet izraelite të ekstremit të djathtë, të cilat përfshinin një deputet, një ministër dhe demonstrues që bastisën një ndërtesë të gjykatës ushtarake për të protestuar ndaj masave kundër ushtarëve.
