Hetuesit e Departamentit amerikan të Drejtësisë (DoJ) kanë gjetur gjashtë dokumente të tjera të klasifikuara gjatë një kontrolli 13-orësh në shtëpinë e presidentit Joe Biden në Delaware, ka thënë një avokat i Bidenit, raportoi të dielën BBC-ja.
Avokati Bob Bauer ka thënë se gjithashtu janë marrë shënimet e shkruara personalisht me dorë dhe materialet përreth, ndërsa në kohën e sekuestrimit, Bideni dhe gruaja e tij nuk ishin të pranishëm.
“Presidenti ofroi qasje në shtëpinë e tij për të lejuar hetuesit të kryejnë kontroll në të gjitha ambientet për të dhënat e mundshme të zëvendëspresidentëve dhe materialet e mundshme të klasifikuara”, ka thënë Bauer të shtunën.
Disa dokumente të sekuestruara në pronën e tij Wilmington të premten ishin nga koha e tij si senator dhe të tjera nga qëndrimi i tij si zëvendëspresident nën Barack Obaman.
Në fillim të këtij muaji, avokatët e Bidenit thanë se grupi i parë i dokumenteve të klasifikuara ishte gjetur më 2 nëntor në Qendrën Penn Biden, një institut kërkimor që presidenti e themeloi në Uashington DC.
Një grup i dytë regjistrimesh u gjet më 20 dhjetor në garazhin e shtëpisë e tij në Wilmington, ndërsa një dokument tjetër u gjet në një hapësirë ruajtjeje në shtëpi më 12 janar.
Pas gjetjes së dokumenteve, presidenti tha se ekipi i tij ia dorëzoi menjëherë Arkivit Kombëtar dhe Departamentit të Drejtësisë.
Nuk është e qartë pse Bideni i kishte mbajtur ato.
Sipas Aktit të Regjistrimeve Presidenciale, të dhënat e Shtëpisë së Bardhë supozohet të shkojnë në Arkivin Kombëtar, ku ato mund të ruhen në mënyrë të sigurt.
Një këshilltar i posaçëm, Robert Hur, është caktuar për të udhëhequr hetimin se si janë trajtuar dokumentet e ndjeshme.
Zbulimi vjen pasi edhe ish-presidenti i SHBA-së, Donald Trump, po përballet me një hetim për keqpërdorimin e tij të pretenduar të qindra dokumenteve të klasifikuara në rezidencën e tij në Florida Mar-a-Lago. /koha
