Gjermania dënoi liderin e Partisë së ekstremit të djathtë “Stram Kurs” (Linja e Rreptë) në Suedi për djegien e Kuranit të Shenjtë para Ambasadës së Turqisë në Stokholm, transmeton Anadolu Agency (AA).
Zëdhënësi i Ministrisë së Jashtme të Gjermanisë, Christian Wagner, në një konferencë për shtyp të mbajtur në Berlin, për gazetarin e AA-së tha: “Ne dënojmë ngjarjen e ndodhur gjatë fundjavës. Ishte mungesë respekti dhe jashtëzakonisht e pahijshme”.
Ai gjithashtu tha se ata dyshojnë se ky veprim përfaqëson pikëpamjen e shoqërisë shumicë në Suedi.
Wagner tha se provokime të tilla kontribuojnë në ndarje dhe se atyre duhet t’u përgjigjemi me solidaritet dhe unitet më të madh.
Duke theksuar se liria e fesë dhe besimit, si dhe liria e protestimit dhe shprehjes, janë një e drejtë e njeriut si një vlerë e lartë për të cilën qeveria gjermane dhe partnerët e saj evropianë në mbarë botën japin përpjekje, Wagner tha: “Nga ana tjetër, gjuha e urrejtjes qartësisht nuk është pjesë e vlerave evropiane”.
Duke thënë se Turqia dhe Suedia janë anëtarë të Këshillit të Evropës, Wagner tha se Evropa është në favor të bashkëjetesës paqësore të të gjitha feve.
