Polonia ka thënë të martën se është informuar nga Gjermania se nuk ka ndërmend të angazhohet në negociata për ndonjë dëmshpërblim të Luftës së Dytë Botërore ndaj Varshavës, pasi Berlini e konsideron çështjen të mbyllur, raportoi AP.
Ministria e Jashtme e Polonisë tha gjithashtu se i është drejtuar Kombeve të Bashkuara për mbështetje në përpjekjet e saj për të fituar kompensim për rreth 1.3 miliardë dollarë humbje të vlerësuara të pësuar nën pushtimin e Gjermanisë naziste në vitet 1939-45.
Gjatë gjithë mosmarrëveshjes së zgjatur, Gjermania ka këmbëngulur se çështja u mbyll me vendime të marra gjatë kohës së komunizmit, kur Varshava hoqi dorë nga kërkimi i dëmshpërblimeve. Polonia thotë se ishte nën presionin e Moskës. Ajo dërgoi një kërkesë zyrtare në tetor.
Udhëheqësit e Polonisë kanë sugjeruar se ekziston një mundësi për negociata.
Ministria e Jashtme e Polonisë tha se në një notë zyrtare të 28 dhjetorit, qeveria në Berlin tha se “çështja e dëmshpërblimeve dhe kompensimeve për humbjet gjatë luftës mbetet e mbyllur dhe qeveria gjermane nuk ka ndërmend të hapë negociatat për këtë temë”. /koha
