Gjykata Supreme e Kosovës ka refuzuar ankesën e Partisë Demokratike të Kosovës (PDK), e cila kërkonte përsëritjen e votimit të balotazhit për kryetar të Mitrovicës.
Ky vendim erdhi pas shqyrtimit të kërkesës së PDK-së që pretendonte parregullsi në fletëvotime, përfshirë përzierjen e klasave dhe problemet me shfaqjen e numrit serik në to.
PDK-ja kishte kërkuar nga autoritetet zgjedhore që të urdhëronin rivotimin në këtë komunë, duke argumentuar se këto parregullsi mund të kishin ndikuar në rezultatin përfundimtar.
Paneli Zgjedhor për Ankesa dhe Parashtresa (PZAP) kishte hedhur poshtë kërkesën e PDK-së më 14 nëntor, duke argumentuar se nuk kishte prova të mjaftueshme që të dëshmonin shkelje të natyrës substanciale që mund të ndikojnë në procesin zgjedhor.
Pas këtij vendimi, PDK-ja paraqiti ankesë në Gjykatën Supreme, duke kërkuar që Komisioni Qendror i Zgjedhjeve të urdhërohej për përsëritjen e procesit zgjedhor.
Në njoftimin e Supremes, thuhet se kjo instancë ka vlerësuar qëndrimin e PZAP-së si të drejtë dhe të bazuar, duke refuzuar ankesën e PDK-së.
Sipas Gjykatës Supreme, asnjë nga pretendimet e PDK-së nuk u vërtetua dhe nuk ka pasur shkelje të natyrës që mund të ndikojnë në integritetin e procesit zgjedhor ose në rezultatin e tij.
Në përfundim, Gjykata Supreme konstaton se dëshmitë e paraqitura nga PDK-ja nuk ishin të mjaftueshme për të krijuar bindjen se ishte e nevojshme një përsëritje e procesit zgjedhor, duke përfunduar se nuk ka bazë ligjore për urdhërimin e rivotimit në Mitrovicë./
