Grupi “Wagner”, i themeluar nga Yevgeniy Prigozhin, i cili vdiq pasi avioni i tij privat u rrëzua në Rusi, njoftoi se vazhdon aktivitetin në Afrikë dhe Bjellorusi, transmeton Anadolu.
Në deklaratën e bërë në emër të Grupit “Wagner” nga llogaria në rrjetet sociale e kompanisë “Konkord”, e cila mësohet se i përket Prigozhinit, thuhet se grupi i luftëtarëve mercenarë vazhdon aktivitetet në Afrikë dhe Bjellorusi.
“Nuk bëhet fjalë për mbylljen e kompanisë. Komanda e kompanisë private ushtarake ende është duke kryer të gjitha detyrat e caktuara dhe duke menaxhuar kompaninë”, thuhet në deklaratë.
Udhëheqësi i “Wagner”-it kishte tensione me komandantët rusë
Prigozhin, i njohur si “kuzhinieri” i presidentit rus Vladimir Putin dhe i cili filloi një rebelim kundër qeverisë ruse, doli në plan të parë kur grupi i tij paraushtarak “Wagner”, i cili vepron në shumë vende, luajti një rol në luftën e Ukrainës.
Grupi i “Wagner”-it ka dërguar trupa në konflikte të ndryshme jashtë Ukrainës në Lindjen e Mesme dhe Afrikë, përfshirë luftën civile në Siri. Prigozhin ka akuzuar në mënyrë të përsëritur ministrin rus të Mbrojtjes, Sergej Shoigu dhe shefin e Shtabit të Përgjithshëm rus Valeriy Gerasimov për “paaftësinë” dhe për mungesë të qëllimshme të njësive të “Wagner”-it që luftojnë në Ukrainë muajt e fundit.
Ministria ruse e Mbrojtjes kishte nxjerrë një vendim që “formacionet vullnetare” në Ukrainë të nënshkruajnë kontrata me të, pa përmendur asnjë emër. Kjo lëvizje u pa si përpjekje nga qeveria për të fituar më shumë kontroll mbi “Wagner”-in.
Themeluesi i “Wagner”-it, Prigozhin, filloi një rebelim të armatosur kundër qeverisë ruse më 24 qershor. Rebelimi përfundoi me ndërhyrjen e presidentit bjellorus, Alexander Lukashenko. Ndërsa mercenarët e Prigozhinit dhe “Wagner”-it shkuan në Bjellorusi pas rebelimit, ata filluan të trajnojnë ushtarët bjellorusë atje.
U njoftua se Prigozhin vdiq në një avion privat që u rrëzua në Rusi
Në deklaratën nga Agjencia Federale Ruse e Transportit Ajror (Rosaviatsiya) më 23 gusht, u raportua se 10 persona humbën jetën kur avioni privat me Prigozhinin në të u rrëzua.
Sipas deklaratës, përveç Prigozhinit, në listën e pasagjerëve në avion u përfshinë edhe emrat e ndihmësit të tij dhe prej themeluesve të “Wagner”-it, Dmitriy Utkin, Sergey Propustin, Yevgeniy Makaryan, Aleksandr Totmin, Valeriy Chekalov dhe Nikolay Matuseyev.
Thuhet se ekuipazhi prej 3 personash, i përbërë nga Aleksey Levshin, Rustam Karimov dhe Kristina Raspopova, gjithashtu humbën jetën në aksident. Duke thënë se “Wagner”-i nuk kishte ekzistencë ligjore, Putin shprehu ngushëllimet e tij për familjet e atyre që humbën jetën nga rrëzimi i avionit.
