Sekretari i Përgjithshëm i OKB-së Antonio Guterres theksoi, përmes zëdhënësit të tij, se skela artificiale e instaluar nga Shtetet e Bashkuara në Gaza dhe që filloi të funksionojë sot, nuk është e mjaftueshme për të lehtësuar nevojat humanitare në enklavën palestineze.
“Pyetja themelore është: a do të jemi në gjendje të ofrojmë ndihma të mjaftueshme për t’i mbajtur njerëzit gjallë? Ne kemi thënë tashmë shumë qartë se nëse gjërat nuk ndryshojnë rrënjësisht për mirë, përgjigja është jo.”, tha zëdhënësi Farhan Haq në një konferencë shtypi, duke iu përgjigjur një pyetjeje në lidhje me efektivitetin e skelës lundruese.
Sipas Pentagonit, korridori do të dërgojë rreth 500 tonë ndihma në dy ditë dhe do të ndihmojë më shumë se dy milionë njerëz në rrezik nga uria. Por zëdhënësi i OKB-së përsëriti, siç ka bërë tashmë ditët e fundit, se korridori “nuk ka për qëllim të zëvendësojë asnjë vendkalim (tokësor)”. /abcnews
