Qendrat e votimit janë hapur në Bangladesh për zgjedhjet e para parlamentare që nga kryengritja e vitit 2024, e cila rrëzoi nga pushteti ish-kryeministren Sheikh Hasina.
Këto janë zgjedhjet e para pa partinë e saj, Lidhjen Awami, e cila është ndaluar të marrë pjesë pasi protestat e udhëhequra nga studentët i dhanë fund sundimit 15-vjeçar të Hasinës.
Një nga pretendentët kryesorë për të formuar qeverinë e ardhshme është Tarique Rahman, nga Partia Nacionaliste e Bangladeshit (BNP). Ai është djali i ish-kryeministres Khaleda Zia dhe u kthye në Bangladesh në dhjetor, pas 17 vitesh vetë-mërgimi në Londër.
Mbi 300 mijë forca sigurie janë angazhuar për mbarëvajtjen e procesit zgjedhor në vendin me rreth 170 milionë banorë. Votimi pritet të mbyllet në orën 16:30 sipas kohës lokale.
Qytetarët po votojnë me shpresën për reforma, duke synuar luftën kundër korrupsionit, papunësisë dhe problemeve të tjera që shënuan periudhën e qeverisjes së Lidhjes Awami.
Protestat e vitit 2024 nisën si kundërshtim ndaj kuotave të punësimit, por u shndërruan në dhunë në mbarë vendin, duke lënë mbi 1.400 të vdekur, shumica si pasojë e veprimeve të forcave të sigurisë.
Sheikh Hasina, e kritikuar për shtypje autoritare ndaj kundërshtarëve politikë, dha dorëheqjen më 5 gusht 2024 dhe u largua në Indi.
Më 8 gusht 2024, ekonomisti dhe fituesi i Çmimit Nobel për Paqe, Muhammad Yunus, mori drejtimin e një qeverie të përkohshme, me detyrën për të rikthyer rendin dhe për të organizuar zgjedhjet.
Nën administrimin e përkohshëm janë nisur reforma, përfshirë një Kartë Kombëtare në korrik, e cila propozon ndryshime kushtetuese që do të vendosen paralelisht me votimin parlamentar.
Analistët e shohin këtë proces zgjedhor si një mundësi për rivendosjen e rendit demokratik në Bangladesh, pas vitesh akuzash për manipulime zgjedhore dhe represion politik.
Më shumë se 2.000 kandidatë po garojnë për 300 vendet e parlamentit, ndërsa mbi 27 për qind e tyre janë të moshës 25–44 vjeç. /mesazhi
