Bezalel Smotrich, truri i gjenocidit në Gaza dhe mbarë Palestinën…
Bezalel Smotrich, ministri aktual i Financave i Izraelit dhe një figurë kyçe në Ministrinë e Mbrojtjes, përfaqëson krahun më ekstrem të qeverisë së Benjamin Netanyahu-t.
Me një karrierë të ndërtuar mbi idealet e zgjerimit territorial dhe spastrimit etnik, ai është shndërruar në arkitektin ideologjik të politikave që shumë ndërkombëtarë i cilësojnë si gjenocidale ndaj popullit palestinez.
I lindur në vendbanimin fetar Hapsin në Lartësitë e Golanit dhe i rritur në Beit El, një qendër e radikalizmit të kolonëve në Bregun Perëndimor, Smotrich u brumos me ideologjinë fetare sioniste.
Edukimi i tij në yeshiva (shkolla fetare) të linjës së ashpër bashkoi judaizmin me një nacionalizëm militant. Që në vitin 2005, ai u ndalua nga shërbimi i brendshëm i inteligjencës, Shin Bet, nën dyshimin për organizimin e protestave të dhunshme kundër tërheqjes nga Gaza, duke u shfaqur herët si një “ekstremist hebre” i rrezikshëm për rendin publik.
Pas dështimeve fillestare, Smotrich hyri në Knesset në vitin 2015, duke u bërë shpejt zëri më i ashpër i kolonëve. Si udhëheqës i partisë “Sionizmi Fetar”, ai arriti të diktojë formimin e qeverive të fundit të Netanyahut.
Në dhjetor 2022, ai mori kontrollin e financave të shtetit, por edhe pushtet të paprecedentë mbi administratën civile në Bregun Perëndimor.
Ky rol i ka lejuar atij të kanalizojë shumw fonde drejt vendbanimeve ilegale dhe të shfuqizojë ligje që pengonin kolonizimin e mëtejshëm, duke e kthyer pushtimin de facto në një aneksim të hapur.
Smotrich nuk e fsheh synimin e tij për ta kthyer Izraelin në një teokraci të sunduar nga ligji i Torës, i ngjashëm me kohën e mbretit David. Ai ka deklaruar hapur se “nuk ekziston diçka e tillë si populli palestinez” dhe se emri Palestinë është thjesht një trillim gjeografik.
Për të, zgjidhja është e thjeshtë dhe brutale: palestinezët duhet të pranojnë jetën nën supremacinë hebraike pa asnjë të drejtë kombëtare, të emigrojnë, ose të eliminohen nga forcat e sigurisë nëse rezistojnë. Ky vizion është përshkruar si një regjim i pastër aparteidi.
Retorika e tij ka arritur nivele tronditëse. Ai ka mbrojtur ndarjen e grave arabe nga ato hebreje në maternitete dhe ka bërë thirrje për shkatërrimin total të qyteteve palestineze si Havara. Kohët e fundit, deklarata e tij se vdekja nga uria e 2 milionë njerëzve në Gaza mund të jetë “e drejtë dhe morale” për të liruar pengjet, u dënua globalisht si çnjerëzore.
Përmes kontrollit të buxhetit dhe pushtetit ushtarak, Smotrich ka transformuar mjetet e shtetit në armë për realizimin e vizioneve të tij mesianike. Duke nxitur konfliktin në Gaza, Liban dhe ndaj Iranit, ai po e shtyn rajonin drejt një lufte të pafundme.
Në kabinetin izraelit, ai nuk është thjesht një ministër, por ideologu që po legjitimon gjenocidin dhe po shkatërron çdo mundësi për paqe, duke e pozicionuar veten si “trupi” pas politikave më të errëta të Izraelit modern.
Me më shumë se 70.000 viktima në konfliktet e fundit, politikat e Smotrich mbeten dëshmia më e qartë e një transformimi radikal të shtetit izraelit drejt një regjimi etno-nacionalist të pamëshirshëm. /tesheshi
