Irani ka konsideruar mundësinë e sulmit ndaj aseteve ushtarake amerikane në Evropë nëse presidenti i SHBA-së, Donald Trump e përshkallëzon luftën, pasi Teherani peshon opsionet për të zgjeruar konfliktin përtej Lindjes së Mesme, raportoi të mërkurën Financial Times, transmeton Anadolu.
Duke cituar dy persona të afërt me qeverinë iraniane, e përditshmja britanike tha se forcat iraniane kanë vlerësuar sulmet e mundshme ndaj aseteve të SHBA-së në vendet e Evropës Juglindore, duke përfshirë Bullgarinë, e cila muajin e kaluar miratoi përdorimin e bazës së saj ajrore Bezmer nga avionët e SHBA-së për furnizim me karburant.
Qiproja, ku një bazë ajrore britanike u godit nga një dron në mars, është konsideruar gjithashtu ndër objektivat e mundshëm në rast të një sulmi të rinovuar të SHBA-së, sipas një prej burimeve.
Forcat iraniane kanë shqyrtuar veçmas mundësinë e synimit të kabllove me fibra optike nënujore në Ngushticën e Hormuzit në rast të përshkallëzimit të mëtejshëm, thuhet në raport.
Një burim i tha Financial Times se Teherani po përgatit opsione për të zgjeruar konfliktin nëse Trump do të ndjekë kërcënimet e mëparshme për të sulmuar infrastrukturën iraniane.
“Nëse SHBA-ja shkon shumë larg, Irani do të mbrohet me çdo çmim, do të shkojë përtej rajonit dhe do të godasë edhe Evropën”, tha burimi.
Raporti vjen pasi negociatat për rihapjen e Ngushticës së Hormuzit mbeten të bllokuara dhe perspektivat për rinovimin e bisedimeve Teheran-Washington janë zbehur.
Trump tha të martën se nuk ka “bisedime apo biseda në vazhdim, apo të planifikuara” me Teheranin.
Zyrtarët ushtarakë iranianë kanë paralajmëruar më parë se çdo bazë ushtarake e përdorur për të kryer sulme kundër territorit iranian mund të konsiderohet si objektiv.
Raporti citon gjithashtu ekspertë ushtarakë të thonë se Irani ka raketa të afta për të arritur në pjesë të Evropës jugore dhe juglindore, megjithëse efektiviteti dhe saktësia e tyre mund të bien në rreze më të gjata.
Irani dhe SHBA-ja nënshkruan një memorandum mirëkuptimi në qershor që synonte t’i jepte fund luftës dhe t’i hapte rrugën një marrëveshjeje më të gjerë, por marrëveshja u prish më vonë mes akuzave të ndërsjella për shkelje dhe armiqësi të ripërtërirë.
Që atëherë, përpjekjet diplomatike kanë dështuar të prodhojnë një përparim në rihapjen e Ngushticës së Hormuzit ose rifillimin e negociatave për një marrëveshje më të gjerë.
