Ish-ambasadori i Kosovës në Shqipëri, Sylë Ukshini, e konsideron deklaratë të vonuar dhe jo në nivelin e lidershipit të saj, deklaratën e presidentes Osmani se Kosova duhet të rreshtohet me aleatët edhe në çështjen e Urës së Ibrit, sikur në çështjet e tjera.
Ukshini, e konsideron të tillë sepse sipas tij kreu i shtetit deklarohet para të gjithëve e jo në fund.
“Kjo deklaratë është e vonë dmth tani sot kur janë deklarua OJQ, opozitë, sepse kreu i shtetit deklarohet para të gjithave por është çështje e saj. E dyta, deklarata ka njëfarë kundërthënie sepse unë jam i prirë për ta lexuar mes rreshtave. Rreshti i parë thotë është një vendim politik, nuk është dashur të mbyllej pse është mbyllur, dmth për të lënë spekulime që kjo po din e dikush e ka mbyllë dmth nuk është ashtu. E kanë mbyllur strukturat paralele serbe , ka qenë një vendim aty që e kanë pasur pushtetin. Unë mendoj që është një deklaratë e vonuar dhe nuk është në nivelin e lidershipit të saj”, ka thënë Ukshini në emisionin “Ditari në Tëvë1.
Tutje, Ukshini për deklarimet e BE-së që ka kërkuar të mos hapet ura e Ibrit në këtë kohë, ka thënë se në pafuqi për të implemntuar marrëveshjen e Ohrit, po merret me “cikërrime” siç është çështja e urës, dinarit etj.
Ai ka thënë se nga qëndrimet e BE-së ndaj Kosovës, të krijohet përshtypja që vetëm pesë vende të bllokut e kanë njohur Kosovën e të tjerat jo.
“Mendoj që qeveria mirë ka bërë që e ka aktualizuar këtë çështje sepse unë kam qenë drejtor për Ballkanin në Ministrinë e Jashtme dhe kam ndjekur situatën atëherë çdo gjë edhe të dialogut e kam ndjekur hap pas hapi dhe nëse ka qenë një marrëveshje në vitin 2015 dhe ka qenë edhe një zotim publik i Bashkimit Evropian, që jo më larg se në qershor të vitit 2016 ura do të hapet, atëherë Bashkimi Evropian në vend se të na mbajë ligjërata që gjoja qenka sensibile, këtu gati sa nuk po na thotë se dëgjo është sikur muri i Berlinit, andej është Bashkimi Sovjetik, andej është Zveçani, epo nuk është Bashkimi Sovjetik, kështu që nuk ka nevojë Peter Stano të bëjë aq drama. Por unë mendoj se Bashkimi Evropian në pafuqi për ta implementuar marrëveshjen e Ohrit po merret me cikërrima”, ka shtuar ai.
Për çështjen e urës së Ibrit ka folur të mërkurën edhe i dërguari i BE-së për dialogun Kosovë-Serbi, Miroslav Lajçak.
Ai ka mohuar se BE është kundër hapjes së urës, por ka thënë se kjo çështje duhet të diskutohet në dialog. /teve1
