Yoram Hamo, një zyrtar izraelit i ngarkuar me politikën e mbrojtjes dhe planifikimin strategjik në Këshillin e Sigurisë Kombëtare, ka dhënë dorëheqje, transmeton Anadolu.
Siç raporton transmetuesi publik KAN, Hamo dha dorëheqje për shkak të zhgënjimeve për dështimin për të marrë vendime politike në lidhje me veprimet e ardhshme në Rripin e Gazës.
Këshilli i Sigurisë Kombëtare në përgjigje të dorëheqjes pretendoi se Hamo ka shprehur qëllimin e tij për të dhënë dorëheqje disa muaj më parë, duke përmendur “arsye personale që nuk lidhen me çështjet publike”.
Lidhur me situatën në Rripin e Gazës, KAN tha se një plan i diskutuar së fundmi në Këshillin e Sigurisë Kombëtare do t’i paraqitet së shpejti Kabinetit të Luftës.
Plani, tha transmetuesi izraelit, përshkruan administratën civile në Rripin e Gazës për një periudhë që varion nga gjashtë muaj në një vit.
KAN pretendoi se shërbimet thelbësore do t’i ofrohen popullatës përmes ndërmarrjeve private arabe dhe përfundimisht kontrolli i Rripit të Gazës do të kalojë në entitete lokale jo armiqësore ndaj Izraelit.
Qeveria izraelite thotë se çdo qeveri e ardhshme në enklavën palestineze të rrethuar nuk duhet të udhëhiqet nga Hamasi.
Izraeli ka sulmuar Gazën që nga sulmi ndërkufitar nga grupi i rezistencës palestineze Hamas më 7 tetor, në të cilin sipas Tel Avivit u vranë afër 1.200 njerëz.
Të paktën 35 mijë palestinezë, shumica prej tyre gra dhe fëmijë, janë vrarë që atëherë.
