Egjipti ka deklaruar se është gati të presë të plagosurit nga Rripi i Gazës dhe të dërgojë ndihma humanitare menjëherë sapo të rihapet pika kufitare Rafah.
Guvernatori i Sinait të Veriut tha se “qendra e menaxhimit të krizave po punon mbi skenarë të ndryshëm të mundshëm, përfshirë dërgimin e ndihmave”, duke theksuar se autoritetet egjiptiane janë në gjendje gatishmërie të plotë.
Sipas tij, institucionet shëndetësore dhe shërbimet emergjente në rajon janë përgatitur për të pranuar të plagosurit palestinezë, ndërsa ndihmat humanitare janë gati për t’u transportuar drejt Gazës sapo kushtet ta lejojnë këtë.
Zyrtarët egjiptianë kanë ritheksuar se rihapja e pikës kufitare Rafah është jetike për lehtësimin e krizës humanitare në Gaza, ku popullsia përballet me mungesa të rënda të ushqimit, barnave dhe shërbimeve bazë.
Egjipti ka bërë thirrje për garantimin e qasjes së sigurt dhe të pandërprerë të ndihmës humanitare, duke nënvizuar rolin e Rafahut si një korridor thelbësor për shpëtimin e jetëve dhe zbutjen e vuajtjeve të civilëve palestinezë. /mesazhi
