Korporata Energjetike e Kosovës (KEK) do të eksportojë përgjatë tri viteve deri në 73.2 milionë euro thëngjill në Maqedoninë e Veriut, ka bërë të ditur Qeveria e Kosovës.
Sipas njoftimit, kontrata është lidhur për herë të parë mes dy kompanive publike, KEK dhe ESM.
Çmimi i përcaktuar është 24.4 euro për ton, pa TVSH, i cili sipas Qeverisë është dukshëm më i favorshëm për KEK-un krahasuar me kontratat e mëparshme të realizuara përmes ndërmjetësuesve.
Qeveria ka rikujtuar se në eksportin e fundit të thëngjillit në Maqedoninë e Veriut, KEK-u e kishte shitur atë për vetëm 8 euro për ton, çmim që përfshinte edhe tantiemën prej 3 eurosh dhe TVSH-në prej 18 për qind.
Sipas Qeverisë, kjo kontratë nuk do të ndikojë në prodhimin e energjisë elektrike në Kosovë. ESM do të jetë përgjegjëse për eskavimin dhe transportin e thëngjillit të blerë nga KEK-u.
