Misioni i NATO-s në Kosovë, KFOR, ka njoftuar se ushtarët italianë kanë kryer patrullime të rregullta përgjatë vijës kufitare administrative në Komunën e Istogut.
Siç është bërë e ditur nga KFOR-i, patrullimet janë pjesë e aktiviteteve të përditshme.
“Ushtarët italianë të caktuar në Komandën Rajonale në perëndim të #KFOR-it të udhëhequr nga #NATO kryen patrullime të rregullta përgjatë vijës kufitare administrative në komunën e Istogut. Këto patrulla janë pjesë e aktiviteteve të përditshme të KFOR-it për të siguruar një mjedis të sigurt dhe të sigurt për lirinë e lëvizjes, për të mirën e të gjitha komuniteteve që jetojnë në Kosovë”, u tha në njoftim.
Po ashtu KFOR-i bëri të ditur se po vazhdon të zbatojë mandatin, bazuar në Rezolutën 1244 të Këshillit të Sigurimit të OKB-së, të vitit 1999- për të kontribuar në një mjedis të sigurt për lirinë e lëvizjes për të gjithë njerëzit që jetojnë në Kosovë, në çdo kohë dhe në mënyrë të paanshme.
Duhet theksuar se ditë më parë disa qytetarë kishin hasur në ushtarë serbë të cilët po qëndronin në bjeshkët e Istogut, saktësisht në një pikë ndarëse në mes Kosovës dhe Serbisë.
Në lidhje me këtë çështje lajmi.net disa herë radhazi ka tentuar të marrë përgjigje nga ana e Ministrisë së Mbrojtjes, por këta të fundit kanë zgjedhur të heshtin.
