Ukraina ka kërkuar një takim urgjent të Këshillit të Sigurimit të OKB-së, pas vendimit të Rusisë për të vendosur armët bërthamore taktike në Bjellorusinë fqinje.
“Plani rus është një hap tjetër provokues nga regjimi kriminal i presidentit Vladimir Putin”, tha sot Ministria e Jashtme në Kiev.
“Kjo do të minonte parimet e Traktatit të Mospërhapjes bërthamore, arkitekturën e çarmatimit bërthamor dhe sistemin ndërkombëtar të sigurisë në tërësi”, tha ministria.
Rusia është një nga anëtarët e përhershëm të Këshillit të Sigurimit të OKB-së, organi më i fuqishëm i Kombeve të Bashkuara në Nju Jork.
Ukraina u bëri thirrje katër anëtarëve të tjerë të përhershëm, SHBA-së, Britanisë së Madhe, Francës dhe Kinës që të miratojnë masa kundër këtij “shantazhi bërthamor”.
Përveç kësaj, Kievi i bëri thirrje Grupit të Shtatë Fuqive Ekonomike (G7) dhe Bashkimit Evropian që të paralajmërojnë Bjellorusinë për pasojat e një dislokimi të tillë.
Putin njoftoi dje në mbrëmje se Rusia dhe Bjellorusia kanë rënë dakord për vendosjen e armëve bërthamore taktike. /atsh
