Përfaqësuesi amerikan, Thomas Massie, bëri thirrje të hënën për hetimin dhe ndjekjen penale të personave të lidhur me rrjetin e trafikimit seksual të financierit Jeffrey Epstein, ndërsa ndërmori hapa për të detyruar një votim mbi një projektligj të ri për transparencën, transmeton Anadolu.
“Lexova emrat e disa bashkëpunëtorëve të Epsteinit që duhet të hetohen dhe ndiqen penalisht”, shkroi Massie në X pas fjalimit në Dhomën e Përfaqësuesve.
Republikani nga Kentucky përmendi disa figura të njohura, përfshirë Princin Andrew, Jes Staley, Leon Black, Les Wexner, David Copperfield dhe Lapo Elkann.
Ai gjithashtu akuzoi Lesley Groff për komplot për trafikimin e grave.
Massie kritikoi Departamentin e Drejtësisë për mbajtjen të fshehtë të më shumë se 3 milionë dosjeve hetimore.
– Nismë për transparencë
Massie dhe një grup dypartiak, ku bën pjesë edhe Përfaqësuesi Ro Khanna, nisën një peticion për ta sjellë në sallën e Dhomës së Përfaqësuesve projektligjin e dytë për transparencën e dosjeve të Epsteinit.
Peticioni kërkon 218 nënshkrime për të detyruar votimin. Projektligji synon të rrisë transparencën pas publikimit të 3,5 milionë faqeve, shumë prej të cilave me redaktime të konsiderueshme.
Jeffrey Epstein vdiq në burg në vitin 2019, ndërsa priste gjyqin për akuzat lidhur me trafikimin seksual. Massie tha se legjislacioni i ri është i nevojshëm për t’u dhënë “mbyllje” viktimave dhe për ta mbajtur Departamentin e Drejtësisë përgjegjës.
