Në Asamblenë e Këshillit të Evropës, e mbijetuara e luftës së Kosovës, Saranda Bogujevci, deklaroi të martën se Kosova qëndron me Ukrainën dhe popullin ukrainas përball agresionit rus.
Duke iu drejtuar deputetëve ukrainas, nënkryetarja e Kuvendit nga radhët e VV-së, tha se populli i Ukrainës është në mendjen, zemrën dhe në lutjet e kosovarëve.
Ky është adresimi i parë i një deputeti kosovar në këtë institucion ku synon të anëtarësohet.
“Tani, duke qenë se kjo është hera ime e parë që i drejtohem seancës plenare, do të doja t’u them kolegëve të mi ukrainas dhe gjithashtu popullit të Ukrainës se mendimet, zemrat tona dhe lutjet tona janë me ju. Ne e dimë shumë mirë se çfarë po kaloni. Unë vetë jam e mbijetuar e një masakre gjatë luftës në Kosovë. Do të jemi gjithmonë me ju në këtë luftë. Shpresojmë që së shpejti kjo luftë e tmerrshme të marrë fund dhe drejtësia të triumfojë. Lavdi Ukrainës”, deklaroi ajo.
Sipas Bogujevcit, duhet qenë të guximshëm dhe të vendosur për të marrë vendime që do të kenë ndikim pozitiv në të ardhmen e Ballkanit Perëndimor.
Ajo shtoi se Kosova dhe i gjithë Ballkani Perëndimor janë pjesë e Evropës, e sipas saj, nuk mund të ketë të ardhme tjetër pos të qenit “anëtarë të familjes së Bashkimit Evropian”.
Për fjalën e Kosovës në Këshill të Evropës, ka shkruar në Facebook, ministrja e Drejtësisë, Albulena Haxhiu.
“11 tetor 2022, Kosova e fitoi të drejtën e fjalës në Asamblenë Parlamentare të Këshillit të Evropës. Për herë të parë u dëgjua zëri i Republikës së Kosovës”, shkroi Haxhiu.
Në majin e këtij viti, Kosova aplikoi për anëtarësim në Këshillin e Evropës. Zyrtarët e Qeverisë janë shprehur optimistë që nisma e Kosovës do të marrë përkrahje.
Aplikacionin e shqyrton Komiteti i Ministrave dhe pas shqyrtimit të gjendjes në Kosovë, fjalën përfundimtare e jep Asambleja Parlamentare e cila përbëhet nga përfaqësuesit kombëtarë të shteteve anëtare. Pranimi bëhet me votat e 2/3 të shumicës.
Çdo anëtar i Këshillit të Evropës duhet të pranojë parimet e sundimit të ligjit dhe zbatimin e të drejtave dhe lirive themelore të njeriut për të gjithë personat brenda juridiksionit të atij shteti.
Këshilli i Evropës është një organizatë ndërkombëtare për të drejtat e njeriut, demokracinë dhe sundimin e ligjit në Evropë, me seli në Strasburg të Francës.
