Zëdhënësi i Kremlinit, Dmitry Peskov, e përshkroi takimin e fundit mes presidentit rus Vladimir Putin dhe të dërguarve amerikanë Steve Witkoff dhe Jared Kushner në Moskë si “një hap të vogël drejt paqes”, raporton Anadolu.
Duke folur në një konferencë për media, Peskov tha se Moska “i vlerëson shumë” përpjekjet e negociatorëve amerikanë për vendosjen e paqes.
“Sigurisht, çdo përpjekje është pak a shumë efektive; është një hap i vogël drejt paqes”, tha Peskov. “Ne i vlerësojmë shumë përpjekjet e negociatorëve amerikanë për vendosjen e paqes”, shtoi ai.
Witkoff dhe Kushner u takuan me Putinin në Moskë të shtunën, në kuadër të përpjekjeve të SHBA-së për t’i dhënë fund luftës Rusi-Ukrainë, e cila ka hyrë në vitin e pestë. Më pas, ata udhëtuan drejt Kievit dhe u takuan të dielën me presidentin ukrainas Volodymyr Zelenskyy, duke shënuar vizitën e tyre të parë në Ukrainë që nga fillimi i luftës.
Këshilltari i Kremlinit, Yury Ushakov, tha se bisedimet zgjatën 3 orë e 10 minuta dhe përfshinë luftën në Ukrainë, si dhe projekte të mundshme madhore ruso-amerikane. Ai e përshkroi takimin si “substancial, konstruktiv dhe jashtëzakonisht të sinqertë”.
Moska dhe Kievi zhvilluan për herë të fundit negociata paqeje nën ndërmjetësimin e SHBA-së në fillim të këtij viti, me tri raunde bisedimesh në janar dhe shkurt.
Që atëherë, negociatat janë pezulluar, ndërsa Moska dhe Kievi ia kanë atribuuar ndërprerjen luftës së SHBA-së me Iranin, e cila filloi në fund të shkurtit.
