Shefi i agjencisë izraelite të sigurisë së brendshme Shin Bet, Ronen Bar, pranoi dështimin për të parandaluar sulmin e Hamasit të 7 tetorit, transmeton Anadolu.
“Ne të gjithë ndiejmë se sigurinë, për të cilën ishim gjithmonë krenarë, nuk ia garantuam popullit të Izraelit më 7 tetor”, tha Bar në një ceremoni përkujtimore të mbajtur në selinë e agjencisë Shin Bet në Tel Aviv.
“Ne të gjithë e ndjejmë humbjen, ndjenjën se mund ta kishim parandaluar dhe si drejtues i agjencisë dhe përgjegjës për aktivitetet e agjencisë, unë e ndjej atë ndoshta më shumë se kushdo”, shtoi ai.
Bar tha se Shin Bet po ndërmerr një “hetim të thellë të rolit të saj në dështimet e 7 tetorit”.
“Një hetim i dhimbshëm dhe domethënës. Ne do të mësojmë nga kjo dhe do të korrigjojmë atë që kërkohet”, tha ai, duke shtuar: “Pa besimin e opinionit tek institucionet shtetërore dhe tek ne, ne nuk kemi të drejtë të ekzistojmë”.
Izraeli ka vrarë mbi 35 mijë palestinezë në Gaza, si hakmarrje për një inkursion ndërkufitar të 7 tetorit nga Hamasi, në të cilin sipas Tel Avivit u vranë rreth 1.200 njerëz.
Rreth 85 për qind e 2.3 milionë banorëve të Gazës janë zhvendosur brenda enklavës, ku ka mungesë të gjerë të ushqimit, ujit dhe ilaçeve.
Izraeli akuzohet për gjenocid në Gjykatën Ndërkombëtare të Drejtësisë, e cila në një vendim të përkohshëm në muajin janar tha se “besohet” se Izraeli po kryen gjenocid në Gaza, si dhe urdhëroi Tel Avivin të ndalojë aktet e tilla dhe të marrë masa për të garantuar ofrimin e ndihmës humanitare për civilët në Gaza.
